Ensemen cun il producent da musica Sandro Dietrich ha la gruppa d’uffants «Singvögel» edì ses segund album. «Üsi Welt» vegn publitgà sco DC dubel. Sin l’emprim sa chattan las chanzuns originalas e sin il segund las versiuns instrumentalas per che mintgin e mintgina possia chantar cun. «Singvögel» n’è betg be il num da la gruppa mabain era las figuras ch’accumpognan quest project e ch’èn da chattar en las chanzuns, sco grafica sin l’album e sin t-shirts. Cun il segund album sa sfundran ils uffants pli profund en ils caracters e las istorgias dals utschels. Las diesch chanzuns èn – sco era tut tschai da quai project - naschì en collavuraziun cun ils uffants durant workshops communabels.
Singvögel...
... èn uffants da l’entir Grischun che han plaschair da chantar chanzuns en il dialect Grischun. Ils uffants èn integrads durant l’entir process. Els pon purtar lur ideas da tematicas per chanzuns e choreografias che vegnan lura messas enturn communablamain. Uschia cuntegnan las chanzuns adina temas actuals che fatschentan ils uffants. La cumbinaziun dal chant ed il moviment saja er in motiv per la popularitad dal cor tar ils uffants, declera manadra da cor Daniela Candinas.
Sandro Dietrich
El è producent da musica, musicist, president da l’uniun «Graubünden Musik» ed era scolast primar. Quell’experientscha e las impressiuns da sia lavur sco scolast ha el laschà cular en il project «Singvögel». La finamira dad el è da pudair mussar als uffants co la producziun da musica funcziuna da A fin Z – da l’emprim tun, tar la registraziun en in studio fin la preschentaziun sin differentas tribunas.