Legria e giubel – trais dis suenter la mort da Cristus vid la crusch il Venderdi sontg è el da Pasca levà da mort en vita. Igl è la pli gronda festa cristiana ed il cumenzament dal temp da legria, dal temp pascal fin Tschuncaisma.
La notg sin la dumengia da Pasca vegn envidà il fieu da Pasca. Lez vegn benedì e purtà en baselgia cun ils cloms liturgics «Lumen Christi» ed ina nova chandaila da Pasca (Tscheri pascal) vegn envidà. Er en la claustra benedictina a Mustér datti gronda legria.
Cun benedir il fieu e clamar il «Lumen Christi» durant l'entrada en baselgia – quai è sco ina explosiun da la legria – la vita turna.
L'emna sontga saja intensiva, di l'avat Vigeli Monn. Però cura ch'ils dis da Pasca arrivan saja quai in giubel ed ina legria ch'el sentia fitg bain en la claustra.
Ils chants e la musica d'orgla sa mida per Pasca cumpareglià cun il temp da curaisma. Quai conferman er ils dus Benedictins pader Paul (responsabel per il chant) sco er frar Stefan, l'organist da la claustra da Mustér.
Pled sin via
Per ils uffants è Pasca ina festa. Els dastgan tschertgar in gnieu zuppà cun lieurs da tschigulatta, ovs da zutger ed ovs colurads. Forsa sa chattan en quests gnieus er anc autras dultscharias. Ma daco datti insuma quest usit e tge ha la lieur da far cun Cristus? Silvia Huang-Gartmann (magistra a la scola chantunala) cun ses pled sin via per Pasca.
La musica en l'emissiun speziala per Pasca vegn da Johann Sebastian Bach («Der Himmel lacht, die Erde jubiliert» BWV 525), Heinrich Schütz («Auferstehungs-Historie» per soli, instruments e basso continuo), Wolfgang Amadeus Mozart («Missa in C-Dur», Krönungsmesse) e da Alfred Reed («Praise Jerusalem»).
