En l'emissiun dal di da la festa naziunala scuvran Corina Schmed (RTR), Jean-Marc Richard (RTS), Sandy Altermatt (RSI) e Sven Epiney (SRF) punts fitg differentas. Els visitan umans che fan punts tranter culturas, linguas e religiuns.
Il viadi cumenza en la part giusum dal Grischun, al cunfin cun l'Italia. Cun l'auto da posta maina il viadi da Castasegna sper ils lais engiadinais fin a San Murezzan. Sin la lingia spectaculara da l'Alvra vai vinavant cun la Viafier retica tar ina da las punts las pli impressiunantas da la Svizra – il viaduct da la Landwasser. Durant lur viadi raquintan els a nus las istorgias ch'els han passentà las davosas emnas en l'entira Svizra ed a l'exteriur.
Davos las culissas da la filmada
Per la moderatura Corina Schmed èsi la quarta giada ch'ella fa part. Questa giada eri dentant betg segir sch'ella po ir cun, perquai ch'ella ha gì ina blessura al pe. Cunzunt il highline era ina gronda sfida, ma il pe ha tegnì e la suga era, ed ella è turnada sauna e legra enavos.
Nov song quadriling
«Nus essan in» – uschia sa numna la nova chanzun ch'è vegnida producida ensemen cun musicistas e musicists da tut las quatter regiuns linguisticas (ANIK, Ivo Orlik aka Giganto, Ariel Hasler aka SmackWTG, Nicolas Bisig aka Chandro, Océane Meyer aka Franklin, Domenico Genna aka NX, Groovefactory Berna, Sandro Dietrich e Lou Zarra) aposta per l'emissiun dal prim d'avust .
La scola da saut Tanzerina ha creà ina coreografia latiers. Las sautunzas ed ils sautunzs èn er da vesair en la scena finala ch'ha lieu sut il viaduct da la Landwasser:
