La persuna
Christoph Cajöri è naschì ils 23 da schaner 1958 a Tusaun. El è creschì si en ina famiglia musicala, ses bab Christian era magister, chantadur ed in pianist da vaglia. Quest dachasa e la scola primara a Tusaun han dà ad el ina buna basa e sveglià ses talent da musica. El ha frequentà la scola chantunala a Cuira nua ch'el ha gì instrucziun da musica tar Gion Giusep Derungs (1932). Er quai ha influenzà el ed animà da studegiar musica.
Suenter la matura è Cajöri sa deditgà al cello. L'idea davostiers era da vulair far ina furmaziun da la famiglia Cajöri. Il bab al clavazin, la sora a la violina e Christoph al cello. El ha terminà il studi cun il diplom d'instrucziun e da concert, parallel è el sa deditgà al chant solo sco era pli e pli fitg al direger. Cello suna el quasi mai pli, sulet per occasiuns spezialas sco per exempel per las nozzas da ses figl. Uschiglio s'engascha el cumplainamain per il direger. Oz po el guardar enavos sin ina vita segnada da bleras emprovas, blers concerts e registraziuns da discs. Blers bels muments da success.
Il dirigent
Dal 1984 fin il 1988 ha Christoph Cajöri dirigì il chor e l'orchester da l'universitad da Basilea. Dal 1989 fin il 1999 ha el manà l'orchester da chombra dal Grischun, (oz Kammerphilharmonie Graubünden). Vitiers ha el dirigì il chor Basler Liedertafel, il Männerchor Zürich (28 onns), il Franziskus Chor Zürich, ils DRS-Singers (oz l'Ensemble Cant'animato). Dapi il 2011 diregia el il chor da concert Pro Arte Bern e dapi l'atun 2012 il chor viril Ligia Grischa.
Christoph Cajöri en emissiuns da RTR:
Artg musical:
Noss chors:
Il redactur da radio
Cun 40 onns ha el vulì empruvar ora insatge auter. El è s'annunzià tar la SRF Musikwelle ed ha survegnì il 1999 ina plazza sco redactur da musica, en spezial sco redactur per musica da chors. I saja stà fitg interessant era perquai ch'el haja puspè gì d'emprender novas chaussas, emprender d'ir enturn cun la tecnica, tagliar, emprender da far intervistas eav.
Igl è stà in temp fitg interessant e jau hai pudì schlargiar mes orizont.
En sia lavur sco redactur ha el emprendì d'enconuscher la scena da chors svizra, chors pitschens, chors gronds, chors da buna fin excellenta qualitad. En sias emissiuns ha el vulì preschentar l'entira paletta e far enconuschent ils chors ed uschia mussar che la Svizra ha ina scena da chors fitg viva. Sco el ha concedì ina giada ha el schizunt emprendì d'enconuscher chors grischuns pir sco redactur da radio. Fin il 2008 ha el fatg questa lavur e preschentà cun plaschair ils differents chors. Il 2016, a chaschun da 20 onns Musikwelle, è el vegnì envidà sco anteriur redactur en l'emissiun Fiirabigmusik.
