Cla Biert è naschì ils 26 da fanadur 1920 a Scuol, en in da chasa puril. Suenter la scola populara ha el frequentà dal 1936 fin il 1940 il seminari da magisters a Cuira. En quest temp ha el emprendì d'enconuscher il futur scrivent Andri Peer. Cun lez ha el gì in'amicizia fin la mort.
Suenter il seminari è Cla Biert stà scolast primar a Scuol (1941 – 1946) ed è sa scolà vinavant a Turitg, Losanna e Genevra al scolast secundar. Dal 1947 fin il 1951 ha el instruì a la scola secundara a Ftan, lura a Zuoz e davent il 1956 scola secundara a Cuira. Il 1975 pattiva el d'ina greva malsogna che ha sfurzà el da chalar da dar scola. Il 1978 è el returnà en l'Engiadina, a Sent nua ch'el è lura mort ils 19 da mars 1981.
Litteratura
Cla Biert è stà in impurtant exponent engaschà da la litteratura e cultura rumantscha. En ses raquints ha el tematisà l'adolescenza, l'erotica e la violenza «Pangronds» (1949), «Amuras» (1956), «Laina verda» (1957). En si'ovra principala «La müdada» (1962) ha el descrit la sperta midada da la societad purila tradiziunala. «Fain manü» è in'istorgia d'uffants ed en «Il descendent» (1981) sa fatschenta el cun la figura dal bab pussantischem.
Festivitads per il centenari da Cla Biert
Musica
Er la musica ha giugà ina gronda rolla en la vita da Cla Biert. El ha rimnà chanzuns popularas da l'Engiadina e la Val Müstair ed era ensemen cun sia sora Stasia, sia dunna Angelica (nata Menzel) e sias figlias Nesa ed Aita in enconuschent trubadur engiadinais. Ses figl Risch è pianist.
Sco actur era el activ en la gruppa da teater La Culissa. Ensemen cun Men Rauch e Jon Semadeni ha el scrit e cumponì ovras cabaretisticas «La panaglia» (1951) e «La travaglia dal docter Panaglia» (1954).
Cla Biert en emissiuns da RTR
Qua chattais ina survista da differentas persunalitads ord la scena da cultura rumantscha.