Siglir tar il cuntegn

Header

cuntegn

Purtret Robert Cantieni

Cun la chanzun «Lingua materna» ha Robert Cantieni stgaffì in'imni rumantsch ch'exprima sco betg in'autra chanzun l'amur per la lingua da la mamma.

Ils 6 da schaner 1873 è Robert Cantieni naschì a Ftan sco figl da Dumeng (pur) e Chatrina (n. Secchi). Suenter il seminari scolastic a Cuira ha el dà scola a Ftan (1892-93) e Samedan (1893-1900). Lura è el sa decidì da studegiar musica a Turitg. Ses magisters eran tranter auter Carl Attenhofer e Friedrich Hegar. Suenter avair terminà cun success il studi è Robert Cantieni returnà en l'Engiadina, ha maridà e davent il 1910 ha el lavurà sco dirigent e scolast privat per clavazin, chant e cumposiziun a S. Murezzan e Samedan. Il 1911 ha el elavurà ensemen cun Florian Grand «L'Engiadina», in cudesch da chanzuns per chors maschadads.

En quests onns ha el stuì percorscher che la vita da musicist en la patria n'è betg uschè simpla. Trumpà d'intrigas cultural-politicas e critica subjectiva è el sa decidì da bandunar l'Engiadina. Dal 1922-37 è el stà magister da musica a la Scola chantunala ed al Seminari scolastic a Cuira e dirigent da divers chors a Cuira (Männerchor Frohsinn, Chor viril Rezia, Chor mischedau Alpina) e da la Ligia Grischa / Glion (1924-32). Robert Cantieni è stà in musicist engaschà ed uschia er davantà cun raschun commember d'onur da l'Uniun chantunala da chant dal Grischun.

audio
150 onns Robert Cantieni
ord Artg musical dals 08.01.2023. Maletg: RTR grafica
laschar ir. Durada: 59 minutas 13 Secundas.

Ils onns 1940 ha el lu fatg sia pasch cun l'Engiadina ed è sa deditgà puspè pli fitg a la chanzun rumantscha. El ha edì pliras collecziuns da chanzuns: «Las Grusaidas», «La chanzun ladina», «Suldanellas», «Evangelisches Kirchengesangbuch», «La Merlotscha» (collecziun sursilvana ensemen cun Flurin Camathias).

Ils 11 da mars 1954 mora Cantieni a Cuira ed è sepulì sin il santeri da Daleu. Sin ses crap da fossa sa chatta l'inscripziun: «Tia chanzun viva».

Chara lingua da la mamma

L'entschatta da ses temp sco magister da musica e dirigent en l'Engiadina ha el tranter auter scrit scrit la chanzun «Lingua materna» u «Chara lingua da la mamma». Il text è da Gudench Barblan. Cun questa chanzun ha el stgaffì ina sort imni da las Rumantschas e dals Rumantschs. Nagin'autra chanzun po svegliar tants sentiments da carezia per la lingua materna sco quella. In'autra fitg enconuschenta chanzun da Robert Cantieni è la «Guardia grischuna».

Il forum Chasper Pult davart la pli enconuschenta chanzun da Robert Cantieni:

Ulteriur material or da noss archiv:

Marella dals 28 d'avrigl 2013 che va suenter a la dumonda: Tge pon ins far cun material musical tradiziunal e tge betg?

audio
Marella 28-04-2013: Co viva tia chanzun, Robert Cantieni?
ord Artg musical dals 03.01.2023. Maletg: RTR
laschar ir. Durada: 54 minutas 55 Secundas.

In purtret en Il balcun tort dals 21 da schaner 1973:

video
100 onns Robert Cantieni
Or da Balcun tort dals 21.01.1973.
laschar ir. Durada: 8 minutas 34 Secundas.

RTR Artg musical 14:00

Artitgels legids il pli savens

Scrollar a sanestra Scrollar a dretga