Siglir tar il cuntegn

Header

Corin Curschellas cun in accordeon sin tribuna
Legenda: Corin Curschellas durant in concert il 1996. Collecziun privata Corin Curschellas / Bert Werner
cuntegn

Corin Curschellas La carriera da solista è lantschada (1992 - 2000)

Il cumenzament dals onns settanta ha Corin Curschellas dà sias entschattas sin la tribuna, saja quai sco actura u chantadura. Bun ventg onns pli tard cumpara ses emprim album da solo “Music Loves Me”- in album che cuntegna chanzuns en tudestg, englais e rumantsch.

Batten da l'album "Music Loves Me"mad

Video
10 VOR 10 25-02-1993
Or da RTR dals 25.02.1993.
laschar ir

Quest album cuntegna era la chanzun “la pura”. Per la musica da pop rumantscha è “la pura” in term impurtant. Corin Curschellas prenda ina poesia Gion Cadieli che descriva la dira vita da pura, ina vita idealisada en la poesia. Ordlonder fa Curschellas ina chanzun che pudess vegnir cataloghisada da “etno-pop”. Ina revoluziun en la musica rumantscha!

Video
Muschkito 14.02.1993
Or da RTR dals 30.09.2016.
laschar ir

Il 1995 cumpara il segund album solo da Corin Curschellas: “Rappa Nomada”.

Video
SVIZRA RUMANTSCHA 19-03-1995
Or da RTR dals 19.03.1995.
laschar ir

Per Corin Curschellas èsi temp da sa laschar inspirar d’ina ulteriura metropola: il 1995 parta ella per viver a New York.

Là registrescha ella “Valdun” (1997), l’emprim da ses albums che cuntegna exclusivamain chanzuns rumantschas.

Video
TELESGUARD 21-03-1997
Or da RTR dals 21.03.1997.
laschar ir

Durant las registraziuns per "Valdun" a New York.RTR, I. Jaeger

Sin “Valdun” sa chatta era la “Chanzun da Sontga Margriata”, questa chanzun che vala sco pli veglia chanzun rumantscha. L’interpretaziun da Corin Curschellas è singulara e persunala, ozendi dastg’ins senz’auter pretender che quest’interpretaziun moderna ha manà ad ina spezia da “revival” da questa chanzun populara.

Il 1998 turna Corin Curschellas a Paris, nua ch’ella registrescha “Goodbye Gary Cooper”, ses quart album da solo. Quest album plain colurs e plaschair d’experimentar cuntegna chanzuns en englais, rumantsch (grischun) e franzos.

Video
TAGESFERNSEHEN 17-09-1999
Or da RTR dals 17.09.1999.
laschar ir

Il 2000 cumpara “Sud des Alpes” – in album nua che chanzuns popularas sa maschaidan cun jazz, nua che “pop” rumantsch sa maschaida cun tuns africans e nua che Corin Curschellas viagia chantond da la Langstrasse enfin en il Senegal.

Corin Curschellas cun ils musicists da ses project "Sud des Alpes".RTR, I. Jaeger

En l’ovra da Corin Curschellas chattain nus adina puspè novas interpretaziuns da chanzuns popularas rumantschas, uschia era sin “Sud des Alpes”.