Siglir tar il cuntegn

Header

Dus dals Bernina Boys davant il logo da RTR.
Legenda: Luca Zanolari e Rico Florin – ils Bernina Boys èn enavos. RTR, Flavio Tuor
cuntegn

Purtrets Il return dals Bernina Boys

Sonda, ils 24 d’avust, è il grond di per ils fans da la legendara band da saut da l’Engiadin'Ota – ils Bernina Boys. Suenter bun 20 onns pausa interrumpan els lur sien d’enviern musical, e turnan enavos sin il palc.

20 onns è in lung temp – ed ins po era emblidar bler. Per ils Bernina Boys ch’avevan fatg furora ils onns 70 ed 80, na para quai betg d’esser il cas. Els dattan in concert da comeback e quai gist en il Rondo a Puntraschigna! In pass curaschus – bramà da bain inqual amatur da la musica da saut en l’Engiadin'Ota.

Activs dal 1976 enfin il 1998

La furmaziun è vegnida fundada la stad 1976 a la festa da guaud da Puntraschigna. Rico Florin (e-bass), Luca Zanolari (percussiun), Paul Brülisauer (accordeon) e Werner Horber (trumbetta) èn casualmain s’entupads a questa festa, han tard la notg fatg spontan ina «Jamsession» e sinaquai gist decidì da cuntinuar a far musica ensemen.

Suenter avair chattà il num Bernina Boys – inspirà da la via che collia lur duas patrias Puntraschigna ed il Puschlav, ed in curt temp da preparaziun, han els dà gia il november dal 1976 lur emprim concert.

Els han sunà en furma da quartet, dominà da la colur da la trumbetta da Werner Horber. Els faschevan musica en il stil popular, e cunzunt l'uschenumnà «Oberkrainer engiadinais» ch’era derasà da lez temp en Engiadina. Pli tard è lur repertori musical sa sviluppà vinavant en ils stils da schlagher, dixieland e swing.

Dal quartet al quintet

Gia il 1978 è la band sa midada tar in quintet. Il clarinettist Remo Stecher è vegnì vitiers sco tschintgavel commember dals Bernina Boys. Cun la clarinetta sco segund instrument da melodia sper la trumbetta ha midà era la colur musicala.

Emprima furmaziun da Pius Baumgartner

Il 1979 ha Marco Barandun remplazzà Paul Brülisauer vi da l’accordeon. In dals pass decisivs per il talentà clarinettist da Samedan, Pius Baumgartner, è succedì il 1983. En la vegliadetgna da be 16 onns è el entrà en ils Bernina Boys ed ha remplazzà Remo Stecher.

Oz savain nus, che Pius Baumgartner ha realisà cun sia clarinetta ina lunga carriera sco musicist da professiun. Ils Bernina Boys èn stads sia entschatta, ed el è stà fidaivel fin la fin a sia furmaziun mamma.

Bernina Boys.
Legenda: MAD

La fin

Suenter ils onns grass da la musica da saut è quest trend plaunet ì vers la fin ils onns 90. Vers il 1998 han ils Bernina Boys decis da terminar lur lunga via communabla. Enfin il 2004 han els bain anc dà singuls concerts privats, public n’èn els dentant betg pli sa preschentads.

RR actualitad 11:00