Ils 15 da zercladur avess in dals gronds musicants e cumponists da la musica populara grischuna e svizra ses 85avel: Peter Zinsli, naschi il 1934 a Cuira e mort ils 3 da december dal 2011 a Tschiertschen.
Emprims success cun la furmaziun «Peter Zinsli und sini Churer Ländlerfründa»
La carriera da Peter Zinsli cumenza ils onns 50 cur ch’el ha scuvert la musica populara ed ha emprais a sunar l’orgelet en moda autodidacta. In da ses promoturs è stà Josias Jenny e bainspert è Zinsli daventà in num impurtant.
Il 1959 furma el sia emprima chapella «Peter Zinsli und sini Churer Ländlerfründa», tranter auter er cun Arno Caflisch e Sepp Simonelli.
Il retg da la musica populara
Il 1961 registrescha Peter Zinsli ses emprim portatun e blers auters seguan. Er grazia a sia preschientscha en radio e televisiun, quella giada «Für Stadt und Land» da Wysel Gyr, daventa el enconuschent. El suna er savens en grondas salas da la Svizra bassa, lura cun sia furmaziun «Peter Zinsli und sini Ländlerfründa».
En quellas occasiuns vegniva el accumpagnà da musicants da vaglia sco Heiri Goethe, Ueli Mooser, Jost Ribary jun, Urs Glauser e Turi Schellenberg.
380 sauts e cumposiziuns
Peter Zinsli é stà in musicant cun gronda preschientscha sin il palc, e durant ils onns 60, 70 ed 80 el ha influenzà la scena da musica populara – ed er sco cumponist ha el gì success. Blers da ses tocs vegnan sunads anc adina da chapellas da tut la Svizra.
RR La populara 19:05
