Tom Petty è naschì ils 20 d’october 1950 a Gainesville, Florida e mort ils 2 d’october 2017 a Santa Monica, California.
Gia cun l’emprim disc da sia band «Tom Petty & the Heartbreakers» ha el success. Il rock genuin a l'americana cun il sound da ghitarra e la vusch marcanta da Petty procuran per ina lunga seria da hits sco «American Girl», «Refugee» e «Learning to fly».
Cumenzà ha tut avant 40 onns cun l’emprim disc: Tom Petty and the Heartbreakers e la chanzun «American Girl». Trais onns pli tard lura l’emprim grond hit: «Refugee». In toc da rock simpel e direct, cun in bel tempo, duas ghitarras, bass, battaria ed in pau keyboard. Quest toc è lura stà model per blers auters semperverds che Petty e ses Heartbreakers han registrà pli tard. El ha er fatg divers discs sco solist, cun hits sco: «Free Fallin’», «I won’t back down» e «Feel a Whole Lot Better».
Ils Traveling Wilburys
Dal 1988 fin il 1991 ha el er fatg musica cun la supergruppa Traveling Wilburys, cun Bob Dylan, Jeff Lynne, George Harrison e Roy Orbison.
Il 2002 daventan el e sia band commembers da la «Rock and Roll Hall of Fame». Ils 2 october 2017 mora Tom Petty a Santa Monica en California.