Ueli Mooser, naschì ils 24 da schaner dal 1944, po festegiar ses 75 avel. El è in grond enconuschider ed expert da la musica populara, ed er autur dal cudesch «Die instrumentale Volksmusik». L'anteriur magister ha lavurà sco redactur da musica tar radio DRS ed è cumponist, arranschader e multiinstrumentalist. Sin il palc ed en il studio è el da vesair cun clarinetta, orgelin, ghitarra, contrabass ed anc blers auters instruments – ed adina cun ses chapè nair marcant.
In musicant tschertgà che ha sunà tar bleras chapellas
Ueli Mooser è stà ed è commember tar bleras furmaziuns: tar la chapella legendara «Zoge-n-am Boge», il trio Turi Schellenberg, ils Engadiner Ländlerfründa, la chapella Dünner-Mooser-Wicky, e bleras autras pli, e durant tut quels onns ha el sunà bleras giadas cun persunalitads sco Thomas Marthaler, Peter Zinsli, Josias Jenny e Willy Valotti.
Il stil grischun è ses preferì
Ueli Mooser fa surtut musica populara en il stil grischun, er en quel da la svizra interna ed el è segiramain in dals emprims che han experimentà cun auters stils, folclora internaziunala e cun arranschaments nunusitads. Ses pli grond semperverd che tut ils amis da la musica populara enconuschan è il schottisch «Maloja Wind» che vegn sunà da bleras chapellas.
Perscrutar e scuvrir sauts vegls è sia passiun
Ueli Mooser fa perscrutaziuns e tschertga melodias veglias e quellas suna el lura er cun sias diversas furmaziuns sco la Hanneli Musig, la «Ländlermusig momoll» e sia «Tanzkapelle». Ina gronda renconuschientscha hai dà il 2010, lura ha el survegnì la clav d’aur da violina, la distincziun la pli impurtanta da la musica populara.
