Causa ses studi a la scola auta da musica a Lucerna è il giuven dirigent che deriva da la Svizra franzosa tranter auter era daventà part dal mund da brassband. Grazia ad in da ses anteriurs docents da diriger, Hervé Grélat ha el survegnì la chaschun da surpigliar la Brass Band Cazis. El sez sa descriva sco in dirigent multifar.
Mia spezialitad è ch'jau n'hai nagina spezialitad.
Sia lavur na sa drizza betg mo a furmaziuns instrumentalas, mabain er a musica d’orchester u a chors. En connex cun musica saja el fitg mirveglius, perquai saja fitg impurtant per el da s’engaschar per differentas scenas.
Tar brassband e chor datti baingea parallelas
Tenor il dirigent da la «Brass Band Cazis» Robin Bartholini saja l'idea dal tun d'ina brassband fitg datiers ad in chor. En emprima lingia causa che la furmaziun consista mo d'instruments da sturs. In chor consistia era sulettamain da vuschs umanas ed uschea sa furma tar omisdus furmaziuns in tun fitg omogen.
I na dat nagut pli omogen che la vusch umana.
Uschea saja fitg evident da trair a niz la ritgezza da litteratura da chor che la Svizra porscha era per la scena da musica da brassband. Tenor il motto «Origin» ha la «Brass Band Cazis» realisà perquai la primavaira passada in program da concert cun varsaquants arranschaments da chanzuns da chor che derivan dal Grischun. L' «Artg musical» preschenta in extract da quest proget.
Chanzuns popularas per brass
Schi sa tracta da crear arranschaments da melodias chantadas per musica instrumentala è il dirigent e cumponist da Trun, Corsin Tuor in specialist.
Cun avair fatg gia divers arranschaments da quest gener ha el gronda experienza en connex cun questa lavur. D'ina vart porscha la lavur ina gronda libertad, il cuntegn da la chanzun originala stoppia dentant adina vegnir resguardà.
Cun arranschar in tema d'ina chanzun esi impurtant ch'ins sappia tge ch'è il cuntegn da quella.
Ord l'archiv:
