Dad AC/DC ha segiramain mintgin e mintgina gia ina giada udì. Il november 1973 han ils dus frars Angus e Malcolm Young entschavì a furmar la band. Perquai festiveschan els quest november lur giubileum da 50 onns. La data da fundaziun exacta n'è dentant betg uschè clera damai che la constellaziun da la band è adina puspè sa midada. L’emprima midada pli gronda hai dà cura che AC/DC ha remplazzà il chantadur Dave Evans cun Bon Scott. Era il battarist ed il bassist èn vegnids remplazzads.
Ils 19 da favrer 1980 è il chantadur Bon Scott mort tragicamain. La band ha stuì tschertgar in nov chantadur per savair cuntinuar. Scott haveva emprendì d'enconuscher il chantadur Brian Johnson ad intgins concerts cun la band anteriura da Johnson «Geordie». El discurriva para savens dad el. Da quai sa regurdava la band anc suenter sia mort e perquai èn els la fin sa decidids per Brian Johnson. Co che quai ha tunà aud’ins per l’emprima giada sin l'album «Back in Black», il sisavel album dad AC/DC. Quel han els deditgà a Bon Scott. Quest «comeback» è propi grategià bain, perquai che «Back in Black» è fin oz l’album ch’è vegnì vendì il pli savens. Ils onns 80 e 90 han els producì ulteriurs albums sco per exempel «Flick of the Switch» u «The Razors Edge.»
Success porta sfidas
Mo cun la popularitad vegnan apparentamain era ils problems d’alcohol ed autras substanzas. Uschia stuevan il battarist Phil Rudd ed il ghittarist Malcolm Young sa retrair la fin dals onns 80. Chris Slade ha remplazzà Rudd ed il nev dad Angus, Steve Young, ha remplazzà Malcolm perquai che lez ha stuì far ina cura da dischintoxicaziun. Durant ils proxims 20 onns hai dà naginas ulteriuras midadas en il line-up dad AC/DC enfin il settember 2014. Per motivs da sanadad ha Malcolm definitivamein stuì bandunar la band. Pervia d’in culp pativa el da demenza. Trais onns pli tard, il november 2017, è el mort.
Suenter la turnea l’onn 2016 è era il bassist extrà da la band. Il chantadur Brian Johnson stueva gia chalar durant la turnea perquai ch’el avess bunamain pers sia udida cumplettamain.
L’onn 2020 ha AC/DC annunzià il return dal chantadur Brian Johnson, dal battarist Phil Rudd e dal bassist Cliff Williams. Grazia a spezialists e spezialistas d'udida ha Johnson pudì cuntinuar sia carriera sco chantadur da la band. Ensemen han els registrà lur ultim album, ch’els han publitgà il november 2020. L’album sa numna «Power Up.»
Turnea il 2024?
Dapi lura speculeschan fans d’ina ulteriura turnea. Questas speculaziuns èn s’intensivadas il november 2023 cura ch'il president da la citad da Minca, Dieter Reiter, ha confermà envers in reporter dal Bayrischer Rundfunk (BR) che la band haja cudeschà ina cumparsa en il stadion olimpic per ils 12 da zercladur 2024. La band n'ha dentant anc betg confirmà questas famas. Ins dastga pia esser spanegià. Chalar para per il ghitarrist Angus Young dentant betg dad esser in'opziun.
My brother Malcolm, you know, he would tell you: AC/DC is a bit like the Titanic, and on that ship the band went down with the ship. And that’s how he looked at it, you know. And he’s right, most musicians they continue as long as they can.
