Ils «Tschapatalpas» èn ina da las tschintg musicas da tschaiver da Domat. Els èn ils organisaturs da la «Tschapi-Maniiie», la gronda sentupada da musicas da tschaiver a Domat.
Ils «Tschapatalpas» sa preschentan
Num: Tschapatalpas
Motto: #durst
Onn da fundaziun: 1982
Via da fundaziun: Avant 35 onns è la musica da tschaiver vegnida fundada, lura anc cun il num «Schnudres». Tschintg onns suenter è il num vegnì midà sin «Tschapatalpas». Cun ils nums rumantschs fan els era valair la bilinguitad da Domat.
Dirigent: Marco Ambass (dapi 2004)
Commembers: 35
Danunder èn ils musicants: Ils blers musicants èn da Domat. Insaquants commembers vegnan dentant era da Cuira u auters lieus vischinants.
Vegliadetgna media: 25
Toc preferì: «Ma Chérie» da DJ Antoine, «Here I Go Again» da Whitesnake ed «Insomnia» da Faithless
Tschaiver preferì: Ils «Tschapatalpas» n'han betg in tschaiver preferì. Dentant han els adina grond plaschair dal tschaiver a Domat ed a Lucerna.
Tschaivers per onn: La gugga da Domat prenda part a 10 fin 15 tschaivers ad onn.
Onns decisivs: Quest onn è fitg impurtants per ils «Tschapatalpas». Els dastgan festivar gest dus giubileums: Il giubileum da 35 onns musica da tschaiver e la 20avla «Tschapi-Maniiie» ina sentupada da musicas da tschaiver, a Domat. A la «Tschapi-Maniiie» 2018 han els sunà ensemen cun ca. 45 anteriurs «Tschapis».
Dals onns otganta fin uss
Per gronda part sa chattan en la playlist dals da Domat musica dals onns 80, 90 e l’entschatta dals onns 2000. Tranter massa chanzuns englaisas èn dentant era duas en tudestg svizzer. La musica ha il DJ da la gugga, Mario Fetz, mess ensemen. El è mintgamai responsabel per la musica en il bus.