Gudagnà la concurrenza en la categoria jodel ha Nuria Grütter dal chantun Lucerna. Per ils Grischuns, il «Jugendjodler vom Heidiland» da Fläsch, n’hai betg tanschì sin il podest.
En la categoria musica instrumentala han gudagnà «Die Anderä», ina furmaziun dal chantun Sviz. Era da la partida è stada la «Rümli Gang» d’Ardez e Ftan. Els èn vegnids en il final – nua che 13 da uriundamain 26 furmaziuns han pudì far musica live en il radio SRF Musikwelle. La fin finala n’hai era per els betg tanschì en ils top trais.
Tuttina èn Anna Carpanetti, Severin Tönet e Simon Koller cuntents, sco els din envers radio RTR. Els èn stads per l’emprima giada a questa concurrenza.
L’onn passà avevan gudagnà ils «Prättigauer Power» la concurrenza en la categoria musica populara instrumentala. Els han era pudì sunar sco giast live en l’emissiun speziala da SRF Musikwelle.
Tgi è la Rümli Gang?
Severin Tönet, 16 onns, emprendist sco mecanist da maschinas agriculas, Anna Carpanetti, 17 onns, scolara e Simon Koller 17 onns, emprenda pur. Il num da la gruppa vegna dal local d'emprova ch'els han, il «Kaffirümli».