Claudio Steier, ina figura marcanta en la scena da musica dal Grischun, prenda cumià da sia lavur da blers onns. Dapi l’onn 1988 ha el manà la scola da musica Grischun Central e lavura gia dapi l’onn 1981 sco funcziunari da la scola.
Sut sia direcziun è la scola sa sviluppada ad in lieu viv da la furmaziun musicala che ha inspirà generaziuns da scolaras e scolars. Steier lascha enavos ina instituziun ch’el ha furmà cun bler cor ed engaschament.
-
Bild 1 von 2. Claudio Steier durant ina lecziun da clavazin a Savognin. Bildquelle: RTR.
-
Bild 2 von 2. Ina fotografia or da l'archiv: Claudio Steier durant ina lecziun da clavazin. Bildquelle: RTR.
Steier è naschì l'onn 1961 e creschì si a Savognin. Ses bab fascheva il pur e probabel ha la relaziun tar il funs francà las ragischs dal Surmiran. Er el fiss gugent daventà pur, la finala han dentant las aspectativas d'existenza laschà sviar el en in'autra direcziun. El ha fatg il seminari da magisters a Cuira e suenter lez ha el fatg il conservatori ed uschia sa decidì da daventar musicist da professiun. E sco tal è el restà a Savognin e s'engascha er culturalmain per la regiun.
Scola da musica Grischun Central
Il 1979 ha la scola da musica Grischun Central cumenzà cun sias activitads, cun l'instrucziun da basa da flauta e dus onns pli tard cun l'instrucziun d'ulteriurs instruments. Il 1988 ha lura Claudio Steier surpiglià la direcziun da la scola da musica e dat uss, la fin da l'onn da scola 2025/26 giu quest post e va en pensiun.
Grazia a ses gust musical vast ha Claudio Steier gì las meglras premissas da manar ina scola da musica. En il purtret dal musicist giain sin ses fastizs musicals ed udin er tge musica che plascha al pianist ed organist.
Spectrum musical vast
Gia en giuvens onns ha Claudio Steier cumenzà a sunar melodica ed ensemen cun in camerat ha el sco buob divertì la glieud cun pitschnas producziuns. Pli tard ha el lura emprendì d'enconuscher il clavazin e quest instrument saja stà si'emprima amur, uschia di el. In enconuschent pianist ch'era magari en vacanzas sin l'Alp Flex ha udì ina giada il pitschen Claudio a sunar ed ha lura motivà il bab ch'el duai guardar che ses figl possia prender uras da clavazin. Uschia ha Claudio Steier gì instrucziun da clavazin tar Gion Giusep Derungs ed al seminari da magisters a Cuira lura er tar Oreste Zanetti e Rudolf Reinhardt.
Gia a chasa en famiglia han ils Steiers chantà bler e gugent ed er al seminari da magisters ha Claudio chantà bler (Chor romontsch, quartet viril, chor facultativ). Pli tard ha el lura era fatg la scolaziun al cantor, ina scolaziun specifica per musica sacrala. 20 onns è el stà responsabel per chant e musica en baselgia a Lachen en il chantun Sviz.
Er la musica instrumentala ha ses plaz en la vita da Claudio Steier. El ha dirigì la Musica instrumentala Savognin, fatg projects cun la Brass Band Grischuna ed era dirigì la Brass Band Cazis nua ch'el ha instradà in enorm svilup da la band.
Musica classica, vocala ed instrumentala n'èn però betg ses sulets plaschairs musicals. Claudio Steier è er fascinà dal pianist da jazz Oscar Peterson ed er il stil d'Oberkrain, en spezial quel da Slavko Avsenik taidla el fitg gugent.
