Siglir tar il cuntegn

Header

video
La decisiun finala tranter la Svizra e la Croazia
Or da News-Clip dals 12.05.2024.
laschar ir. Durada: 1 minuta 11 Secundas.
cuntegn

Sensaziunal Nemo porta il proxim ESC en Svizra

Nemo ha persvadì cun sia chanzun «The code». En quella descriva l'act non-binar la tschertga tar ina identitad non-binara – pia d'ina persuna che na s'identifitgescha ni sco um ni sco dunna. La chanzun è cumplexa cun elements da drum and bass, rap ed opera. Sia preschentaziun sin tribuna cuntrastescha percunter cun simpladad. Ina cumbinaziun musicala e tematica ch'ha funcziunà tras atras.

Ils emprims trais plazs dal final:

  1. Nemo per la Svizra cun 591 puncts
  2. Baby Lasagna per la Croazia cun 547 puncts
  3. Alyona Alyona & Jerry Heil per l'Ucraina cun 453 puncts

Suenter la victoria da Nemo hai num cumenzar a preparar la concurrenza dal 2025. Gia damaun vegnia ina Task Force da la SRG a cusseglier in'emprima giada, scriva l'emettur da radio e televisiun SRF. Citads interessadas possian bainprest s'annunziar. La SRG decida lura ensemen cun SRF sco emettur ospitant e l'organisatura da la concurrenza, la European Broadcasting Union, nua en Svizra ch'il Eurovision Song Contest 2025 vegn ad avair lieu.

video
Il pled d'engraziament da Nemo direct suenter sia victoria
Or da News-Clip dals 12.05.2024.
laschar ir. Durada: 36 Secundas.

Suenter la victoria da Nemo al Eurovision Song Contest a Malmö è suandada ina gratulaziun sin tschella. La cussegliera federala Elisabeth Baume-Schneider per exempel ha scrit che la victoria saja ina stima als divers talents ed a la persunalitad da l'artist svizzer. Ma era da la scena da musica svizra hai dà gratulaziuns. Tranter auter ha Marc Sway manegià che Nemo haja gist scrit istorgia. El saja losch sin l'artist. Ed era Michael von der Heide ch'aveva represchentà la Svizra il 2010 al Eurovision Song Contest ha gratulà via Instagram.

audio
Suenter la victoria da Nemo: il rumantsch e la lingua inclusiva
ord Actualitad dals 14.05.2024. Maletg: Keystone
laschar ir. Durada: 2 minutas 40 Secundas.

Nua vegn l'ESC en Svizra?

Genevra e Basilea èn las emprimas citads ch'han mussà interess per organisar en in onn l'European Song Contest. Il victur da l'ediziun da quest onn, Nemo avess preferì sia citad natala, Bienna, ma lezza scroda probablamain pervi da mancanzas da plazzas da hotels. A decider vegn la SRG/SSR ensemen cun la Televisiun svizra SRF e l'organisatura, la European Broadcasting Union.

Nemo vul turnar a Bienna per magunar ils proxims dis tut quai ch'è capità, sco la persuna artistica da 24 onns ha ditg avant las medias a Malmö.

100 fans beneventan Nemo a l'eroport

Nemo è entant puspè turnà en Svizra la dumengia saira. Cun bandieras e transparents – cunzunt en colurs che representan persunas nunbinaras – han radund 100 fans han beneventà il victur dal ESC a l'eroport da Turitg.

audio
Nemo: «Jau chatta fitg impurtant che quai è pussaivel en Svizra»
ord RTR Audio dals 13.05.2024. Maletg: Keystone
laschar ir. Durada: 57 Secundas.

En ina conferenza da medias ha Nemo declarà co el vul utilisar ses nov status sco victur da l'ESC per s'engaschar per persunas nunbinaras en Svizra. La finamira fiss tenor Nemo l'indicaziun d'ina terza schlattaina per persunas che na sa defineschan ni sco um ni sco dunna.

La terza victoria per la svizra dapi il cumenzament il 1956

La Svizra ha ina lunga istorgia cun la concurrenza europeica. Da las 68 ediziuns dapi 1956 ha la Svizra fatg part a 63 ediziuns ed era gia gudagnà duas giadas. Numnadamain la pli emprima ediziun a Lugano cun «Refrain» da Lys Assia. La segunda giada è Cèline Dion 1988 ida per il titel per la Svizra da lezzas uras cun il titel «Ne partez pas sans moi».

video
La preschentaziun da «The Code» en il final da l'ESC.
Or da News-Clip dals 11.05.2024.
laschar ir. Durada: 3 minutas 3 Secundas.

Cun la victoria da Nemo è er cler che l'ediziun da l'Eurovision Song Contest 2025 vegn ad avair lieu en Svizra.

La via en il final

In indicatur impurtant èn mintg’onn ils biros da scumessas. Els rimnan mintgamai avant l’occurrenza datas da diversas redacziuns da musica, producents, labels e fans da l’ESC per predir las schanzas da mintg’act. Sper Nemo, ch’è stà avant ils mezfinals sin il segund plaz ed anc avant ditg sin l'emprim plaz, ha il candidat da la Croazia Baby Lasagna gì la meglra schanza da gudagnar cun sia chanzun «Rim Tim Tagi Dim». Cun ses imni da rock electronic ha el gia pudì persvader en l’emprim mezfinal.

En il final è vegnì il public en il gieu. Sper ils puncts da la giuria che quintan per ina mesadad quinta il televoting per la segunda mesadad dals puncts finals. Tut en tut persequiteschan dapli che 150 milliuns onn per onn l’Eurovision Song Contest. Mintg’onn pon quels observar in sammelsuri da differentas culturas, geners musicals e preschentaziuns. Quai tanscha da balladas classicas cun chantaduras d’opera, sur chanzuns da pop e rock fin tar preschentaziuns scurrilas.

Tgi è sa participà a l’ESC 2024?

Sco mintg’onn hai era dà il 2024 dus mezfinals nua che las artistas ed ils artists han pudì sa qualifitgar per il grond final. Gia fix en il final è stà la Svezia sco pajais ospitant. Els han tramess cun Marcus & Martinus in duo energetic. Er ils uschè numnads «Big Five» – ils pli gronds finanziaders da la EBU (European Broadcast Union) Germania, Italia, Spagna, Frantscha e la Gronda Britannia èn adina fix da la partida.

RTR actualitad 17:00

Artitgels legids il pli savens