MX3 – TUTS PER IN

L’unitad fa la forza! Ils quatter radios SRF3, Couleur 3, Rete Tre e Radio Rumantsch sa mettan ensemen per preschentar communablamain ina chanzun svizra – mais per mais.

Il logo da l'acziun mx3 - tuts per in. Bild in Lightbox öffnen.

Legenda da maletgs: Mx3 – tuts per 1 MAD

Las redacziuns da musica da RTR, RSI, RTS e SRF sa mettan ensemen per dar dapli forza a la musica svizra. Cun in’acziun communabla tenor il motto «Tuts per in» è vegnì lantschà in powerplay naziunal per mintgamai ina chanzun al mais – e quai exclusiv per chanzuns da mx3.

Curdin Nicolay: «Lat da chavra»

L’acziun communabla per la promoziun da musica va en la proxima runda. E quella auda en mauns rumantschs. Il chantautur engiadinais Curdin Nicolay è l’emprim represchentant rumantsch en quella seria che procura per lingias zunt positivas en la scena da musica svizra.

En la Rumantschia auda Curdin Nicolay tar ils musicists bain enconuschents. Schebain ch’el fa gia dapi blers onns musica ed ha adina puspè registrà qua u là ina da sias chanzuns, ha el edì pir questa primavaira ses emprim disc «Silips e furmias». In disc variant ed inspirant cun melodias che van tgunsch e spert en l’ureglia. E che chatta buna accoglientscha tar il public.
Da sia nominaziun sco emprim rumantsch en «Mx3 – Tuts per in» ha Curdin Nicolay gì talmain grond plaschair ch’el ha decidì fitg spontan ed a curta vista da producir in videoclip tar sia chanzun «Lat da chavra».

Curdin Nicolay cun sia ghitarra avant il microfon da radio. Bild in Lightbox öffnen.

Legenda da maletgs: Curdin Nicolay sin visita en il studio da RTR. RTR, F. Tuor

Elias Bertini feat. Camila Koller: «Wonderful»

La segunda chanzun che dastga sa metter en retscha deriva dal Tessin. Elias Bertini che chanta la chanzun «Wonderful» ensemen cun Camila Koller è il ventiraivel.

D’Elias Bertini dastgan ins quasi schon dir ch’el è in chantadur rutinà. El è stà durant 14 onns il chau da la band «Zero in On» da Locarno. Il 2014 ha el prendì enta maun ina carriera solo. Dapi lura ha el gia edì inqual single. Tgi sa sche l’exploit grategia uss cun «Wonderful».

Cold Bath: «Fire in the Jungle»

L’emprima chanzun da questa acziun è «Fire in the Jungle» da la band Cold Bath da Genevra. Ella vegn preschentada durant il mais settember sin tut ils chanals dals radios cumpigliads.

Promover la musica svizra

Sursiglir cuntegn supplementar

Mx3.ch

  • dapi settember 2006
  • 25'000 bands svizras
  • 115'000 chanzuns
  • 6'000 videos

Mx3.ch è ina plattafurma per la promoziun da musica da SRF 3, Couleur 3, Rete Tre e Radio Rumantsch. Ella porscha a musicistas e musicists svizzers la pussaivladad da preschentar directamain e senza obstachels lur musica al public. Responsabel è in team interregiunal che lavura en las redacziuns da musica da nossas differentas regiuns linguisticas.

RR actualitad 11:30