Venderdi sontg, il di che Jesus è vegnì mess vid la crusch e mort, il pitir e suffrir cuntanschan il pli aut punct. La curaisma va a fin e la levada stat avant porta. Cun la mesemna da la tschendra cumenza per la baselgia cristiana la curaisma, il temp da gigina e dal desister dentant era in temp che vul regurdar al batten. Tenor l'avat Vigeli Monn da la claustra benedictina da Mustér è la curaisma era in temp per ina nov’orientaziun en «Vita e cretta», in sa volver envers la glisch ed il senn da la vita.
En quest’emissiun speziala faschain ina visita en claustra Mustér tar l’avat Vigeli. El raquinta da la muntada da curaisma e tge chants e psalms che vegnan chantads en la liturgia durant ils 40 dis da la mesemna da la tschendra fin sonda Pasca.
Il responsabel per il chant e primchantadur pader Paul dat in'invista en ils chants gregorians (cun in exempel concret) durant quest temp, e l'organist en claustra, frar Stefan, declera tge registers da l'orgla ch'el tira durant quest temp e tge musica ch'è adattada.
Pled sin via
Tge fissan las festas senza musica? Musica metta en notas sentiments da legria ed er da tristezza. Datti er muments per ils quals i na dat naginas notas, nagina musica? Andri Casanova (teolog) cun ses pled sin via per Venderdi sontg, davart «ina pagina vita».
Adattà per il Venderdi sontg è er l'ovra sacrala dal cumponist tschec Jan Dismas Zelenka.
«Gesù al Calvario»
Igl è in oratori main enconuschent cumponì il 1735. La primaudiziun è stada da Venderdi sontg a Dresden. L'oratori ha sulettamain ina scena, ina che n'illustrescha betg il patir da Cristus cun sang, spinas e guttas mabain ina che sa concentrescha sin ils discurs, sin las interacziuns umanas sin il culm dal calvari, il culm nua che Jesus vegn crucifitgà. En il center èn las trais Marias: Nossadunna (mamma da Jesus), Maria Madlaina e Maria Cleofa che spetgan sin il culm il sentenzià.
L' ensemble «Das kleine Konzert» e la «Rheinische Kantorei» dirigì da Hermann Max interpreteschan l'ovra en l'emissiun. Solistas e solists èn la sopranista Ingrid Schmithüsen en la rolla da Nossadunna, la sopranista Larissa Malikowa sco Maria Madlaina, l’altista Lena Susanne Norin chanta la rolla da Maria Clopas (u er Cleofas), il cuntratenor David Cordier chanta la rolla da Jesus (Gesù) ed il cuntratenor Kai Wessel en la rolla da sontg Gion.
