Yello sa cumpona da Boris Blank e Dieter Meier. Las duas corifeas da la musica electronica fan dapi 40 onns lur tipic stil da musica. Musica che n’è betg d’imitar, nunconvenziunal, incumparabel e senza cumpromiss.
Quai resta era tar lur 14avel album «Point» uschia. Yello resta Yello. Sch’ins avra in album dal duo lura san ins tge che spetga ins. E quai è era bun uschia. Els n’èn betg suttamess a la moda. Las monduras ed ils barbis stattan bain, lur sauts minimalistics èn «on point» ed anc adina derasan els lur furbarias. Ins savess dir ch’els hajan dapi 40 onns strusch sa midà. Ma ston els era betg. Gia daditg èn Yello arrivads ed han etablì lur atgna marca.
Tge stuessan ins savair/tadlar da Yello?
Dieter Meier e Boris Blank èn sa scuntrads en in labor d’autos nua ch’els han registrà ramurs da motors. Là han els cumenzà a discurrer e baud chatta l’interess communabel da la musica electronica ed experimentala. Els han cumenzà a registrar las ramurs da divers apparats e maschadà ensemen quellas ramurs tar chanzuns. Cun quai èn els daventads piuniers da la musica electronica ed influenzà fermamain quest gener. Gronds hits dad els èn tranter auter «The Race» ed «Oh Yeah».