Nies Tschespet 79 - In omagi a Theo Candinas

Il scrivent Sursilvan Theo Candinas è stà in dals productivs scripturs rumantschas dals ultims onns. Uschia ha el edì passa 25 ovras litteraras sur tut quels onns, declera il redactur responsabel Martin Cabalzar. Suenter sia mort il 2020 è quai ina ovra postum cun texts per part anc mai publitgads e la schelta dals texts è stada ina sfida, surtut perquai ch’el haja betg pudì discussiunar cun l’autur, di Martin Cabalzar. Tuttina è il 79avel Tschespet ina ovra da quasi 300 paginas. Il nov cudesch cun il titel «Sut la marella» è parti en sis capitels. Sulom patern – Passidas litteraras – Essays filosofics – Columnas e glossas – Reflexiuns davart la litteratura – Span e debatta pervi da la lingua. Da chattar èn texts gia publitgads, per exempel en gasettas, ma la gronda part èn propi texts novs.

Theo Candinas – dal rebel al sabi

Cun sias ovras e cun sia lingua directa ha Theo Candinas era adina puspè tematisà tabus socials. Surtut il Gion Barlac è stà quasi ina revoluziun en Surselva, declera Martin Cabalzar. Ils ultims onns da sia vita saja Theo Candinas, dentant sco blers auters, era vegnì dal rebel al sabi. Dentant saja el adina stà alerts ed haja scrit quasi fin a sia mort, surtut poesias ma era columnas. In tema ch’ha fatschentà pliras giadas intensiv il scrivent oriund da Surrein è il rumantsch grischun. Quai sajan betg tut ses texts e sias poesias vegnidas en il nov tschespet, ma tgi che veglia leger quellas, l’entir relasch litterar da Theo Candinas è en la biblioteca naziunala a Berna.