Siglir tar il cuntegn
cuntegn

Baratta-Chor BarattaChor: Jürg Wasescha, en gir per plirs chors

Ses chors èn repartids da Zug fin Tavau sur la Val Alvra. A las provas va Jürg Wasescha cun ils meds publics e dapertut enturn chatta el dimora.

El dirigia in chor viril e trais chors maschadads.
Legenda: Jürg Wasescha en acziun. El dirigia in chor viril e trais chors maschadads. RTR, Alice Bertogg

Jürg Wasescha dirigia:

  • dapi il 2004 il chor viril Rumantsch da Zug
  • dapi il 2007 il chor baselgia Tavau
  • dapi il 2016 il chor masdo Alvra
  • dapi il 2010 l'Ensembel Vocal Grischun

Dasperas chanta el en diversas furmaziuns, tranter auter en il chor viril Surses, nua ch'el è era vice-dirigent, u era en l'ensemble viril Cantoris dal festival cultural Origen.

Il venderdì-saira senza chant

Quasi tut las sairas durant l'emna è Jürg Wasescha vid diriger ubain chantar cun in chor. Sulettamain il venderdì-saira ha el nagina prova da chant. Lura giauda el dentant gugent in concert u fa lavurs vid il computer.

En gir cun il traffic public

Jürg Wasescha abitescha a Savognin ed ha ina chombra a Tavau. El ha nagin auto. Perquai fa el mintgamai viadi cun il tren ubain il bus. El giauda da pudair lavurar e sa preparar anc durant il viadi sin la prova da chant. E suenter la prova sa revegn el mintgamai sin viadi a chasa. A Zug po el era durmir tar in chantadur.

L'urari dals meds publics procura pia era che las provas da chant chalan ad uras.

Era ils chantadurs èn leds che las provas chalan ad uras. Lura van els gugent en l'ustaria ed era jau giaud da star da cumpagnia anc in mument cun els.
Autur: Jürg Wasescha,dirigent

L'emprim il seminari da scolasts e suenter studegià musica

Gia en la scola secundara ha Jürg Wasescha gì il giavisch da studegiar musica. Sin cussegl da diversas persunas ha el dentant fatg l'emprim il seminari da scolast a Cuira. Dal 2002 fin il 2006 ha Wasescha lura studegià a Lucerna il diriger e la cantoria sco roms principals e la musica sacrala d'orgla sco rom lateral. El ha terminà ses studi sco musicist sacral. Sper ses chors è el era engaschà sco musicist sacral en la plaiv catolica da Tavau.

Il chor viril va fitg a cor

Atgnamain ha Jürg Wasescha naginas preferenzas quai che pertutga ses chors. Ma el conceda ch'il chor viril giascha fitg a cor ad el.

Jau sun creschì si cun in chor viril ed jau hai adina gì ina affecziun per chors virils.
Autur: Jürg Wasescha,dirigent

Dentant giauda il dirigent era da magari simplamain pudair chantar en ina furmaziun, quai senza stuair surprender la responsabladad. Jürg Wasescha chanta tenor e quai è lura sa chapescha era il register preferì dal dirigent. Ma el giauda era in bel segund bass che «po giu tochen sut il chalzers enfin giu en tschaler».