«BarattaChor»: Chors maschadads Sevgein e Grischun Turitg

In chor stat a cor a ses dirigent u a sia dirigenta. Ma igl è la variaziun che fa bun tun. Perquai porscha RTR il barat da dirigentAs e chors. Flavia Walder ed il chor maschadà da Sevgein han ristgà l'aventura - La sort ha decidì ch'i va a Turitg.

Flavia Walder suenter avair tratg la sort Bild in Lightbox öffnen.

Legenda da maletgs: Flavia Walder sa legra sin il barat cun il Chor maschadà Grischun Turitg. RTR

«BarattaChor» è in'acziun da RTR per promover il barat tranter chors e dirigentAs, sco era il barat tranter ils differents chors. E questa giada era il barat tranter Grischuns e Grischunas da differentas regiuns. La sort ha decidì per il Chor maschadà Grischun Turitg per il «BarattaChor» cun il chor maschadà Sevgein.

Chor maschadà Grischun Turitg

chor maschadà grischun turitg Avrir maletg en lightbox.

Legenda da maletgs: Il Chor maschadà Grischun Turitg baratta dirigentA cun Sevgein. mad / Chor maschadà Grischun Turitg

En il Chor maschadà Grischun Turitg chantan Grischunas e Grischuns che vivan a Turitg e conturn. Sco amaturs da la chanzun rumantscha chantan els bler rumantsch, e quai sche pussaivel en tut ils idioms, sco quai ch'i scrivan sin lur homepage. 33 chantaduras e chantadurs èsi che suondan Remo Weishaupt che dirigia il chor. El ha fatg il scolast e suenter studegià musica a la Scol'auta da musica a Turitg. Dapi ch'el ha 18 onns ha el dirigì differents chors. Il Chor maschadà Grischun Turitg dirigia el dapi divers onns.

IL CHOR CHE BARATTA: Chor maschadà Sevgein

chor maschadà sevgein a la festa da chant a falera Avrir maletg en lightbox.

Legenda da maletgs: Il Chor maschadà da Sevgein baratta dirigentA cun Turitg. RTR

Il chor maschadà Sevgein è vegnì fundà il cumenzament dals onns 80. Ma chantà vegniva fingià avant a Sevgein. Actualmain dumbra il chor 30 commembers – 16 chantaduras e 14 chantadurs. Il chor maschadà Sevgein è tant in chor profan sco era in chor da baselgia. Uschia chanta el mintg’onn a pliras festas ecclesiasticas da la plaiv. Quest onn da chant sa prepara il chor sin in concert che ha lieu il matg 2018 e sin la festa da chant chantunala a Chiavenna il zercladur 2018. Flavia Walder (35) è musicista e pedagoga da ritmica. Dapi il 2010 dirigia ella il chor maschadà da Sevgein. Dasperas è ella era la dirigenta dal chor d’uffants Sumvitg e chanta sezza en il Cantus Firmus Surselva.

«BarattaChor» – Co va quai?

1. Chors s'annunzian per far ina prova cun la dirigentA
2. DirigentA tira la sort ord las annunzias inoltradas
3. La dirigentA fa ina prova cun il chor victur e viceversa
4. DirigentA dal chor victur fa l'appel per il proxim «BarattaChor»
5. Da capo

Actualitad mezdi 11:00