Siglir tar il cuntegn

Header

Dus risplis sin in palpiri
Legenda: Ils Dis da litteratura a Domat quest'onn cun il motto "Rispli sin pupi". RTR
cuntegn

Dis da litteratura 2016 Dis da litteratura 2016

Mintg’onn il november è la vischnanca da Domat l’epicenter litterar dal mund rumantsch. Quest onn sa scuntran là, als 26 avels «Dis da litteratura», auturas, lecturs e critichers da la litteratura rumantscha. Radiotelevisiun Svizra Rumantscha rapporta en detagl cun tun, text e maletg.

Il happening litterar a Domat ha gia gronda tradiziun – mintg’onn èn da la partida passa 300 persunas interessadas per la litteratura rumantscha. Ed era quest onn po il giuven comité d’organisaziun avrir las portas da la Sala Tircal per in program multifar, rimnà sut il chavazzin tematic «Rispli sin pupi». I va per impuls ed instruments dal scriver en general, ma surtut dal scriver litterar.

Da la Val Müstair enfin en Val Sumvitg

Quai ch’el sez ha mess sin «pupi» preschenta l’autur svizzer Tim Krohn gia a l’entschatta dals Dis da litteratura, il venderdi saira. L’autur che abitescha dapi dus onns en la Val Müstair prelegia or da ses roman «Zum Paradies». Il punct culminant e magnet dal public da la sonda vegn alura ad esser la concurrenza «Premi Term Bel», nua ch'ina giuria discutescha e valitescha publicmain ils tschintg texts nominads. Sper quella concurrenza vegnan preschentadas en il decurs da la sonda per l’emprima giada duas ovras resch novas: Il «Diari giapunais» da Benedetto Vigne da Salouf/Turitg ed ils novs discs auditivs da Leo Tuor che viva en Val Sumvitg: «ll spért e la val – Der Geist und das Tal».

Cun rispli e palpiri – cun microfons e cameras

La dumengia avantmezdi po alura l'Engiadinaisa Gianna Olinda Cadonau preschentar sia emprima collecziun da poesias «Ultim’ura da la not – Letzte Stunde der Nacht». Ed en il decurs dal suentermezdi vegn alura dà enconuschent il victur u la victura dal Premi Term Bel.

RTR rapporta vast e cumplet da tuts trais dis litterars a Domat, betg mo cun rispli e palpiri, mabain era cun microfons e cameras – cun il suandant program en radio e televisiun:

Radio Rumantsch

  • Magazin da cultura, sonda ils 05-11-2016 a las 11.00
  • Tavulin litterar, dumengia ils 06-11-2016 a las 09.00
  • Actualitad, venderdi enfin glindesdi, ils 04 enfin ils 07-11-2016

Televisiun Rumantscha sin SRF 1

  • Cuntrasts, dumengia ils 06-11-2016 a las 17.25
  • Repetiziun Cuntrasts, sonda ils 12-11-2016 a las 17.25

Artitgels legids il pli savens

Scrollar a sanestra Scrollar a dretga