«En posiziun! Pront! Dai!»
Quels pleds da partenza han manà tras l'entir program litterar da la fin d'emna a Domat. In program varià e spess als Dis da litteratura ch'èn stads il 2017 sut il motto «gieus». Sco mintg'onn ha l'occurrenza pudì dar spievel da la producziun actuala en la litteratura rumantscha. E dasperas ha il comité d'organisaziun era puspè dà spazi per experiments litterars e per vistas sur las saivs rumantschas ora.
Halla Tircal plaina per Pacchioli
En ina halla Tircal bain plaina han pudì preschentar Dumenic Andry, Mario Pacchioli e Chatrina Josty lur ovras recentas. Dumenic Andry ha - secundà da Clà Riatsch - preschentà sia collecziun da poesias «Sablun», divertind il public cun umor fin. Pli festiv è stada la vernissascha da «Remas» da Mario Pacchioli. Sias chanzuns sin basa da poesias sursilvanas, cumponidas atgnamain per chant ed orchester, ha Pacchioli chantà a Domat mo cun accumpagnament al piano (Gieri Maissen). Ma era questas versiuns main orchestralas han pudì entusiasmar il public ch'ha engrazià cun grond applaus. Era la preschentaziun dal cudesch da debut da l'autura Chatrina Josty - «Barbacor / Herzkater» - ha pudì persvader il public da Domat la dumengia avantmezdi.
Experiments e gieus litterars
Per experiments e gieus litterars han procurà quest onn diversas auturas ed auturs - saja cun prelecziuns en rundas pli pitschnas durant la «shot-story-night», saja durant ina runda da prelecziun libra la sonda a mezdi, saja cun performanzas sin tribuna (Stina Hendry, Leander Albin, Jürg Gautschi) ubain cun novas interpretaziuns da vegls gieus auditivs. Per il sguard sur las saivs rumantschas ora han procurà tranter auter il venderdi saira il cabarettist, caricaturist e musicist Manuel Stahlberger e la sonda avantmezdi Flurin Jecker, il giuven autur bernais cun ragischs rumantschas che ha fatg furora litterara quest onn cun ses roman da debut «Lanz».
Ils proxims Dis da litteratura èn planisads per l'emprima fin d'emna da november da l'auter onn - ils 2 fin ils 4 da november 2018.
RR novitads 17:00