Siglir tar il cuntegn
Inhalt

Diari Dumengia, ils 4 da november 2018

Il terz di als «Dis da litteratura 2018» a Domat. Scuvertas ed analisas, novellas e currellas, invistas e revistas cun texts, tuns e fotografias – direct da Domat.

Il ticker è a fin

  • 15:46

    Ed uss èsi uschelunsch - ils Dis da litteratura 2018 èn a fin

    Suenter il punct final cun la premiaziun ha cumenzà spert la gronda partenza. La crème de la crème da la litteratura rumantscha sa sparpaglia puspè - cudeschs novs en las tastgas u en ils chaus.

    A revair a Domat il 2019!

    Dunna paketta cudeschs.
    Legenda: A revair il 2019 - per in onn è Domat puspè stà la chapitala da la litteratura rumantscha. RTR
  • 15:36

    Ellas èn cuntentas

    Las tschintg dunnas dal comité d'organisaziun èn fitg cuntentas cun ils 28avels Dis da litteratura 2018. Ils programs da la saira hajan persvadì ed il nov modus dal Premi Term Bel haja procurà per quella tensiun, ch'ellas vulevan cuntanscher cun la prelecziun anonimisada.

    Las dunnas fan in selfi.
    Legenda: Quatter da tschintg - Corina Schmed, Nadina Derungs, Sara F. Hermann e Natalia Tuor - senza Sereina Nay. RTR
  • 14:57

    Surpraisa: Asa S. Hendry va per la segunda giada cun il Premi Term Bel!

    Il Premi Term Bel 2018 (3’000.-) va ad Asa S. Hendry per ses text «Binaris» – uschia gudogna ella suenter il 2016 la segunda giada il Premi Term Bel.

    Ord la laudatio da la giuria:

    «Persvadì la giuria han las differentas stresas da purtrets, sentiments e relaziuns. Ellas dattan al text ina profunditad, spessadad ed avertezza. Medemamain persvadì ha l’experimentaziun gartegiada en lingua e metafras.»

    Ella e flurs e premi.
    Legenda: Asa S. Hendry survegn il Premi Term Bel 2018. RTR
  • 14:54

    Et voilà – uss vegn l’emprima victura:

    Il Premi dal public 2018 (1’500.-) va a Viola Pfeiffer per ses text «La curridra».

    Els dus.
    Legenda: Viola Pfeiffer e Theo Haas da la vischnanca burgaisa da Domat. RTR
  • 14:52

    La dramaturgia è perfetga ...

    ... sco emprim dà la moderatura Maria Victoria Haas enconuschent las auturas ed ils auturs dals 5 texts en la concurrenza finala:

    • «Quel di» da Tinetta Rauch.
    • «Viadi i’l paradis» da Fadrina Hofmann.
    • «Binaris» è da Asa S. Hendry.
    • «La curridra» è da Viola Pfeiffer.
    • «Curriculum» è da Walter Roselli.

    Da 18 texts ha la pregiuria tschernì 5 per en la concurrenza finala. Tut las finalistas e finalists survegnan 700 francs.

  • 14:43

    Tut Domat è uss gnervus ...

    ... sco proxima occurrenza stat la premiaziun dal Premi Term Bel 2018 sin il program. La moderatura Maria Victoria Haas lascha proximamain il giat or dal satg ...

    Ella scalina.
    Legenda: ... i scalina per l'ultima giada - Sara F. Hermann cloma en sala a la premiaziun Premi Term Bel 2018 nua che la moderatura Maria Victoria Haas spetga gia. RTR
  • 14:28

    Poethreesome u lirica mida vestgì

    Las poetessas Gianna Olinda Cadonau e Prisca Agustoni sa scuntran tranter spazis linguistics: En il rom dal project Poethreesome dal festival da litteratura Babel han ellas midà stgarpas e translatà vicendaivlamain lur ovras en rumantsch, tudestg, talian, franzos e portugais.

    Legende: Audio La poesia dals chalzers abspielen. Laufzeit 01:26 Minuten.
    01:26 min, Actualitad dals 04.11.2018.
  • 13:50

    Co ch'ina spassegiada avra fanestras en in temp lontan

    «L'umbriva dil temps» - Il roman da Paula Casutt-Vincenz oscillescha tranter il preschent ed il passà. Cun spassegiar tras il Parc La Mutta a Falera s’avran a la dus amias Anna e Durana fanestras en il temp mistic gia da ditg passà.

    L'autura sin tribuna cun l'object antic.
    Legenda: Paula Casutt-Vincenz cun ina copia da la guglia cun rudella en bronz chattada sin la mutta da Falera. RTR
  • 13:07

    Rut Plouda fa l’artg da las giaglinas als turpetgs

    Tranter las set giaglinas da Rut Plouda è er Camilla, la pula grischa – autra sco las autras e tuttina na poss’ins betg far excepziuns. Quai è in da numerus artgs, che Rut Plouda fa dal giagliner da las giaglinas a quel en il mund uman.

    Il text è publitgà en la revista Viceversa Litteratura che promova las quatter linguas naziunalas.

    Legende: Audio Rut Plouda en prelecziun - in excerpt abspielen. Laufzeit 01:15 Minuten.
    01:15 min, Actualitad dals 04.11.2018.
  • 12:37

    Las auturas Jessica Zuan e Sidonia Pazeller, avant anc tar la finissascha «Sin il viv», uss en visita tar la lounge da RTR.

    Las duas dunnas.
    Legenda: Dattan Impuls: Las auturas Jessica Zuan e Sidonia Pazeller. RTR
  • 12:26

    Brunch a Domat -

    quai èn 4 tarscholas grondas, 6 buttiglias da prosecco ed ina sessantina da literofils, radunads en il foyer avant la halla polivalenta Tircal.

    Ed in u l'autra tranter dad ellas ed els vegn ad esser in zic pli gnervus sco tut ils auters - il victur u la victura dal Premi Term Bel.

    Per l'emprima giada è vegnida fatga perfin la prelecziun da concurrenza dal Premi Term Bel en furma anonimisada - uschia ch'auter che la giuria na sa anc nagin, tgi che va suentermezdi las 14:45 cun il premi litterar.

    Il buffet da brunch.
    Legenda: Tranter las lingias litteraras datti er in u l'auter mument culinaric. RTR
  • 11:22

    Finissascha da «Sin il viv!» en il salun da coiffeur Haaratelier

    La turnea per festivar il 25avel da l'emissiun Impuls va a la fin - e quai en in salun da coiffeur: Flurina Badel ha envidà Sidonia Pazeller, Jessica Zuan, Carlo Beer e Myriam Pelican (da dretg) da preleger lur texts.

    Ellas ed els en il salun.
    Legenda: La scenaria en il salun da coiffeur - coming soon sin rtr.ch RTR
  • 10:52

    «La cigna» sveglia gia las mirveglias da las lecturas...

    Las auturas signan.
    Legenda: Interess per cudeschs er tar las pli giuvnas: L'autura Gabriela Holderegger Pajarola e l'illustratura Jacinta Candinas signan lur ovra. RTR
  • 10:46

    Las cignas fan bogn senza lur plimas

    «Igl era ina giada in giuven martgadant che è ì vì surmar ... » e tut quai che al succeda suenter, quai san ins uss leger en «La cigna» - l'ediziun nova dad ina paraula veglia, preschentada da la Chasa Editura Rumantscha.

    Legende: Audio David Flepp prelegia - las cignas fan bogn abspielen. Laufzeit 00:24 Minuten.
    00:24 min, Actualitad dals 04.11.2018.
  • 10:08

    La vusch lirica da Luisa Famos en talian

    La lirica da Luisa Famos al ha tutgà en il cor - quai era avant var 15 onns. Dapi alura è il pictur ed autur puschlavin Giovanni Maranta fascinà da las poesias da l’autura ladina Luisa Famos (1930-1974). Perquai è el sa mess a translatar las poesias en lingua taliana.

    Legende: Audio Di d'enviern - Giovanni Maranta e Annina Sedlacek prelegian abspielen. Laufzeit 01:09 Minuten.
    01:09 min, Actualitad dals 04.11.2018.
  • 9:52

    Premi Term Bel: La victura u il victur è ...

    ... gea, quai vegn or lura quest suentermezdi, las 14:45. Tschintg texts èn en la cursa: «Curriculum», «Quel di», «Binaris», «Viadi i'l paradis» e «La curridra».

    En in discurs al radio ha Angela Hendry resumà la concurrenza da la sonda.

    Legende: Audio La concurrrenza litterara Term Bel abspielen. Laufzeit 03:59 Minuten.
    03:59 min, Actualitad dals 04.11.2018.
  • 9:35

    Tranter lingias - la part culinarica da la sonda saira

    Per l'emprima giada hai dà ina sairada da gala en la sala - cun buna qualitad sin palc e plat:

    Legende: Audio Angela Hendry cun las impressiuns da la saira abspielen. Laufzeit 02:56 Minuten.
    02:56 min, Actualitad dals 04.11.2018.
  • 9:25

    Cordial bainvegni - i dat anc bigliets

    Bainvegnids al terz dals Dis da litteratura - cun litteratura da Luisa Famos fin a Paula Casutt-Vincenz - cun brunch - e cun la victura u il victur dal Premi Term Bel!

    La dunna cun il bigliet.
    Legenda: Claudia Blumenthal-Cadruvi spetga cun ils bigliets. RTR

Dumengia, ils 4 da november

09:00 Poesias da Luisa Famos en translaziun
09:45 La cigna
10:30 Impuls live a Domat
12:30 Viceversa Litteratura 12: (Senza) vargugna
13:15 L’umbriva dil temps / Der Wandel der Zeit
14:00 Poethreesome
14:45 Premi Term Bel - surdada dal premi
15:15 Finiziun