Siglir tar il cuntegn
Inhalt

Dis da litteratura 2018 Tranter las lingias litteraras

Per la 28avla giada han lieu a Domat dals 2-4 da november ils Dis da litteratura. Quest onn sut il motto «tranter lingias». Da la partida èn numerus auturs rumantschs: Asa S. Hendry, Benedetto Vigne, Gianna Olinda Cadonau, Paula Casutt-Vincenz, Rico Tambornino ed auters.

Legende: Audio Saira: Dis da litteratura Domat – in sguard sin il program abspielen. Laufzeit 05:23 Minuten.
05:23 min, Actualitad dals 02.11.2018.

Sco mintg'onn l'entschatta da november, sa scuntra era quest onn la scena litterara rumantscha a Domat. Era quest onn ha il comité d'organisaziun cumpilà in program variant sut il motto «tranter lingias».

Vigne, Hendry ed auters

Sin e tranter las lingias dal happening litterar èn zuppadas diversas ivettas. Uschia las vernissaschas da las duas novas publicaziuns da Benedetto Vigne, «Ils ventganov da settember», e dad Asa S. Hendry, «Sin lautget». Entant che Benedetto Vigne prelegia or da ses emprim roman, preschenta Asa S. Hendry sia emprima atgna publicaziun, suenter ch'ella aveva publitgà il 2015 in roman da fantasy sco autura-tandem.

Autras auturas ed auturs che vegnan a preleger quest onn a Domat èn tranter auter Olga Prevost-Bazzell, Rico Tambornino, Paula Casutt-Vincenz, Gianna Olinda Cadonau, Prisca Agustoni, Plinio Meyer, Myriam Pelican, Jessica Zuan e Rut Plouda.

In premi anonim

In dals puncts culminants da quest'ediziun dals Dis da litteratura vegn ad esser puspè la concurrenza litterara «Premi Term Bel» ch'ha lieu la sonda suentermezdi. Bunamain analog al motto «tranter lingias» dals Dis da litteratura, restan però quest onn ils auturs dals tschintg texts nominads anonims. Vul dir ch'ils texts na vegnan betg prelegids a Domat da las auturas e dals auturs sezs, mabain da l'actura Marietta Jemmi. Tant la giuria sco era il public han damai da leger «tranter las lingias» e da giuditgar ils texts senza enconuscher ils singuls auturs. Pir la dumengia suentermezdi vegnan tradids ils nums e surdads ils premis.

Discussiuns e gieus

Radiotelevisiun Svizra Rumantscha vegn a rapportar da l'entira occurrenza dals Dis da litteratura. Uschia dat il Radio Rumantsch spazi a discussiuns litteraras en il Magazin da cultura da sonda, ils 3 da november, ed en il Tavulin litterar cun Martìn Camenisch e Clà Riatsch da dumengia, ils 4 da november. Sco ils davos onns vegn RTR era a rapportar quest onn da Domat en furma dad in «ticker» online che cuzza da venderdi saira enfin dumengia suentermezdi. Igl è quasi in diari tranter las lingias grassas dals Dis da litteratura.

RR actualitad 17:00