Aventuras da princessas da pantoflas, d’umans sco giats e d’eroxs dal jet-set, er numnads «randulins» contemporans, u lura dals varsaquants poets ch’èn inspirads dals lais en Engiadin'Ota. Quai raquintan ils novissims e vegls impuls che Dumenic Andry, Sara Francesca Hermann, Bettina Secchi e Martin Cantieni vegnan a preleger «live» en la stiva da la Chesa Gianzun a Schlarigna.
Questa prelecziun en rom intim è er ina pussaivladad preziusa d’udir il renumà scriptur ladin Dumenic Andry, oriund da Ramosch, che scriva impuls gia dapi l’onn 2005. Ina da sias publicaziuns da prosa curta e lirica, è il cudesch cun ina tscherna da ses impuls ed auters texts curts «Uondas» (2008, editionmevinapuorger). E quest onn ha Dumenic Andry survegnì il Premi svizzer da litteratura per ses tom da lirica «Sablun» (2017, Chasa Editura Rumantscha).
Plinavant vegn la Samedrina Sara Francesca Hermann a preleger en stiva a Schlarigna. Ella è actura e fa part da la cumpagnia da teater Mummenschanz. Dapi il 2016 scriva ella impuls e fa uschia ses emprims pass litterars publics.
Medemamain prelegia il Sursilvan Martin Cantieni, er el scriva impuls pir dapi l'onn 2016. Uschiglio studegia Martin Cantieni filosofia a Turitg, e la filosofia è er savens in tema en ses texts litterars.
La quarta autura d’impuls dal quartet empermettent che prelegia en stiva a Schlarigna, è Bettina Secchi oriunda da Zuoz. Dapi l'onn 1996 viva e lavura ella a Locarno, e dapi il 2004 scriva ella impuls cun magari in zic italianità.