La Chasa editura rumantscha preschenta in nov comic che unescha ils tschintg idioms cun il Rumantsch Grischun. L’istorgia è vegnida scritta da Tim Krohn che stat dapi intgins onns cun sia famiglia en Val Müstair.
En «Pippin il patgific» sa metta il protagonist Pippin en viadi per tschertgar in mail d’aur che è sparì or dal curtin dal prinzi da la Sursilvania. Uss vegn Pippin stratg en in’aventura che al maina tras ils tschintg principadis da la Grischunezia. El vegn accumpagnà d’in curnagl e sto dumagnar situaziuns privlusas. Las figuras ch’el entaupa, discurran ils differents idioms da las valladas.
L’autur Tim Krohn ha scrit enturn la paraula da l’utschè d’aur dals frars Grimm uschia che l’istorgia è ambientada en il Grischun mez fictiv cun las tschintg regiuns rumantschas. L’illustratur Chrigel Farner ha creà dissegns opulents, scurrils e plain detagls.