Walter Lietha tutgava durant ils onns 70 tar ils gronds nums da la scena da musica svizra. Sco chantadur, poet, cumponist e magari er cun fermas criticas dal temp ha el scrit nundumbraivlas chanzuns ed è daventà la vusch d'ina entira generaziun. Ma il cumenzament dals onns 80, il temp da las inquietezzas da giuventetgna, n'èn sias chanzuns tuttenina strusch pli vegnidas sunadas en il Radio DRS. Igl è vegnì quiet enturn il musicist grischun.
Musica ma er cudeschs
Parallelamain cun sia lavur musicala ha Walter Lietha sviluppà ina segunda passiun. Il mund dals cudeschs ch'ha fascinà el gia dapi blers onns è daventà sia segunda pitga. Decennis a la lunga ha el manà in antiquariat ed ina libraria en la citad veglia da Cuira, il «Narrenschiff». Avant paucs onns ha el fatg midada cun ses antiquariat, cun millis da cudeschs istorics, a Trin en Surselva.
L'avust 2025 ha il festival da musica «Alpentöne» dà in concert en onur da Walter Lietha. Corin Curschellas, ina cumpogna da viadi ed inizianta da quest omagi, ha envidà ils pli divers solists svizzers: Stephan Eicher, Sophie Hunger, Michael von der Heide, Max Lässer sco er ils musicists da la «Narrenschiff-Band», ina band realisada aposta, raquintan tge che las chanzuns da Lietha signifitgeschan per els. Ensemen cun el sa preschentan els a quest concert che daventa il center dal film.
Sper las passiuns da l'artist grischun duai la documentaziun «Walter Lietha – drum sing i grad drum» mussar tgi ch'el è. El sez, na po dentant betg respunder la dumonda tgi ch'el è. Walter Lietha spera perquai ch'el sco era il public, vegnan lura a savair tgi che quest Walter Lietha è.
Or da l'archiv:
L'onn passà è Walter Lietha vegnì onurà cun il Premi da cultura dal Grischun.
