Siglir tar il cuntegn

Header

cuntegn

Nov podcast «Pausa cun Nina – Tia pausa per tadlar»

Dovras ina pausa? Lura ès ti qua en il dretg lieu. En il podcast «Pausa cun Nina» faschain nus ensemen ina pausa auditiva. Va er ti sin quest viadi, nua che Nina discurra cun differentas persunas sur da l’impurtanza dal far pausa en noss mund modern.

«Pausa cun Nina» è in podcast per relaxar, star patgific, trair flad profundamain e far in paus en in mund che para mintgatant dad ir in pau spert. Fai in té e prenda in mumentin per tadlar co che Nina discurra en 5 episodas dal far pausa cun differents giasts.

La scolasta da yoga Tina Buchli raquinta co ch’ella è vegnida sfurzada da far pausa suenter in grev accident. Mattiu Defuns raquinta a nus da sias pausas creativas e pertge ch’el dovra pausas per pudair scriver chanzuns. Nus visitain Margreta Solèr che raquinta da sia vita ruassaivla cun la natira a l’ur dal vitg da Castrisch.

E lura sa retira Nina en claustra, in experiment en l’episoda finala per guardar tge che sa mida tar ella suenter dus dis da paus e ruaus. Las mungias da la claustra a Cazas raquintan a nus, pertge che nus essan be colliads cun nus sezs, sche nus giain da temp en temp en il silenzi. Pausa cun Nina – quai è tia pausa per tadlar.

Episoda 1: Bainvegni – Nus faschain pausa

Tge è ina pausa? Avain nus avunda pausas en noss mintgadi? E tge capita, sche nus na prendain betg temp per pussar? En l’emprima episoda va Nina a la tschertga da respostas sin questas dumondas.

Nus cumenzain noss viadi tar ils uffants pitschens. Els èn ils «maisters» da far pausa ed en questa episoda udin nus, pertge che quai è uschia.

audio
Episoda 1: Bainvegni - Nus faschain pausa
ord Pausa cun Nina dals 22.12.2023.
laschar ir. Durada: 32 minutas 35 Secundas.

Episoda 2: Tina fa pausa – la pausa sin la matta da yoga

Tina Buchli ha gì in grev accident dad ir cun aissa. Suenter quest accident è ella vegnida sfurzada da far ina lunga pausa da reconvalescenza. Durant la pausa è ses corp sa regenerà pass per pass. Ma per era sa revegnir spiertalmain da quella experientscha, è ella sa messa sin in grond viadi en l’India. Là ha ella emprendi d’enconuscher yoga – e cun yoga era metodas da far pausas en il mintgadi.

audio
Episoda 2: Tina fa pausa
ord Pausa cun Nina dals 22.12.2023.
laschar ir. Durada: 32 minutas 39 Secundas.

Episoda 3: Mattiu fa pausa – la pausa creativa

Per Mattiu Defuns na datti betg in sulet di, nua ch’el n’è betg confruntà cun sia musica. Viver ses siemi da la musica munta per el da deditgar ses mintgadi a quella carriera e d’era esser cuntanschibel per ses team e ses public quasi mintga di. Ma el ha era sentì ch’el dovra pausas per pudair esser creativ. El raquinta a nus da sia pausa creativa per scriver novas chanzuns sper la mar a Portugal e da sia pausa en la natira durant chatscha.

audio
Episoda 3: Mattiu fa pausa
ord Pausa cun Nina dals 22.12.2023.
laschar ir. Durada: 34 minutas 23 Secundas.

Episoda 4: Margreta fa pausa – la pausa en la natira

Margreta Solèr è vegnida sfurzada da la vita in pèr giadas da far pausa. In mument decisiv è stà che ses partenari ha laschà ella a mesa via, cura ch’ella era en speranza cun sia figlia Lena. Persula ha ella cumbattì per ina vita tenor sias ideas. La fortuna è vegnida cun in pitschen dachasa en la natira per ella e sia figlia a l’ur dal vitg da Castrisch. Quel è per Margreta ses lieu da pausa. Ma ussa, suenter blers onns en questa oasa, duai la chasa vegnir vendida. Co vinavant, sch’ella sto bandunar ses lieu da pausa?

audio
Episoda 4: Margrèta fa pausa
ord Pausa cun Nina dals 22.12.2023.
laschar ir. Durada: 34 minutas 43 Secundas.

Episoda 5: Nina fa pausa – la pausa en claustra

Nina ha il chau plain. Tranter preparaziuns per la finiziun da l’onn e termins da lavur dretg e sanester, decida ella da far ina pausa: ella va en claustra. Per quest experiment rumpa ella gì il contact cun il mund dador la claustra: nagin natel, nagins cudeschs, nagina musica, nagins films. Sulet dus discurs cun las mungias davart il far pausa lubescha ella a sasezza durant quest temp. Co vegn ella a frida cun il silenzi? E tge capita cun ins mo gia suenter dus dis da pausa en ina claustra?

audio
Episoda 5: Nina fa pausa
ord Pausa cun Nina dals 22.12.2023.
laschar ir. Durada: 32 minutas 58 Secundas.

 

RTR Pausa cun Nina

Artitgels legids il pli savens