Avant 10 onns è cumparì lur album da debut «Up In The Sky» in disc cun pop frestg che ha procurà per ina surpraisa e ch'è daventà in grond success. L’album ha survegnì platin, ed er lur proxims dus discs «Oko Town» e «Seven Mountains» han plaschì al public. Dapi il 2015 han els però investi damain en la musica e dapli en lur auters engaschaments.
Ils mais passads han ils frars Buchli, Matt, Joe, Esra e Simri lavurà vi d’in disc nov, ch’els han registrà cun il producent Thomas Fessler. Uss, suenter tschintg onns cumpara «Start Over» – e dapi il prim d’october èn els gia sin ils palcs. Quest disc è ina nova partenza, pertge els n’eran betg segirs tge che capita cun lur carriera. Tuts quatter han fatg ils ultims onns il pass en la hotellaria e gastronomia.
Da 150 sin 10
Lur return ha er da far cun il desideri da cumponer novas chanzuns, da far musica sco band e da star puspè sin il palc. Quai è però stà tut auter che simpel: i mancava la rutina da cumponer e da far musica. Uschia han els cumenzà a sa disar, èn ids vi da la lavur ed han cumponì var 150 chanzuns – e lura destillà quai sin 10 ch’els han registrà la finala en il studio cun Thomas Fessler. Per Matt, il cumponist principal, è quai daventà il disc il pli persunal, cun optimissem e speranza, che descriva valurs e sentiments ferms.
Nov’entschatta era cun tuns novs
Insatge ordavant – ina band sco 77 Bombay Street ch’è daventada enconuschenta cun ses agen stil da musica na vegn betg tuttenina a bandunar ses folk e cumenzar cun tecno. Pia, han ins gia in’idea tge che spetga cura ch’ins taidla l’emprima giada lur album nov. Cun l’emprima chanzun «Drifters in the Wind» sa conferma quell’idea – ina chanzun en lur stil tipic, luc, lev e da buna luna. Be singuls elements d’in synthesizer sternì en la chanzun èn in indizi tge innovaziuns che spetgan anc sin l’album.
- Up In The Sky (2011)
- Oko Town (2012)
- Seven Mountains (2015)
- Start Over (2021)
Surpraisas e vegls enconuschents
Pli marcant è il synthesizer tar «Karaoke Girl» tge che dat in’atmosfera pli lucca che regorda dals onns 80. Anc in zic pli experimental per 77 Bombay Street è «Fox». La chanzun da la vulp sa preschenta en in stil da reggae cun ina presa Steel Drum.
I dat dentant anc adina quellas balladas classicas da folk e las chanzuns luccas da pop ch’ins enconuscha dals frars Buchli. Cun «Yellow Bus» ni «La La Land» vegnan era ils vegls fans da 77 Bombay Street ad esser satisfatgs. Pia ina nova entschatta precauta cun insaquants tuns novs ed ina gronda purziun 77 Bombay Street en il stil enconuschent.