Da tge sa tracti en la nova seria «L'ultim rumantsch»?
En il center da la seria stat la famiglia DURISCH, proprietaria da la pli gronda chasa da medias dal Grischun. Sco giuven ha Gion-Peder (85, numnà GP) fundà l’interpresa. Avant onns ha el dentant decidì da surdar quella a ses figl Gion (52). Quel vul spargnar e reorganisar la fatschenta e betg pli producir la gasetta nunrentabla POSTA. Il conflict è programà! Perquai che la Posta è il project da cor da GP vul el savair nagut pli da ses figl. I na sa tracta betg mo da l’emprima gasetta ch’el ha fundà, mabain er da l’ultima gasetta rumantscha insumma.
Cura che GP mora cumenza il cumbat en la famiglia. El testamentescha ina part da la chasa da medias a sia biadia Ladina (24), quai cun il giavisch ch’ella surpiglia e maina vinavant la Posta. Ma Ladina na vuless avair da far nagut cun il mund da las medias e cun sia famiglia. Dapi onns abita ella a Turitg e cumbatta sco activista cunter concerns gronds e per dretgs d’animals. Vegn Ladina a suprender l'ierta da ses tat?
Tgi stat davos la seria?
Il cineast Adrian Perez ha svilupà il concept ensemen cun la producenta Sophie Toth da Shining film. En in writers room (Simon Nagel, Jen Ries, Adrian Perez) è il concept vegnì finalisà. Manuel Sieber da la firma da producziun Schau a Cuira è la persuna da contact da Sophie Toth ed Adrian Perrez.
