Opera Viva 2025 - Aida: giubileum da 20 onns cun classicher

L'opera Aida è in dals gronds classichers da l'opera taliana ed ina da las operas las pli enconuschentas insumma. Ella raquinta ina istorgia d'amur cun intrigas politicas. L'istorgia sa splega en l'Egipta antica. La princessa etiopica Aida viva sco sclava en la curt egipziana. Ella s'inamurescha dal general egipzian Radamès ch'è tranter auter involvì en cumplots politics. Per Aida datti uschè in permanent vi e nà tranter sia amur per Radamès e sia loialitad vers sia patria.

L'opera, che vegn savens preschentada en grondas chasas d'opera ed arenas vegn preschentada la stad 2025 en la tenda da l'Opera Viva a Sursaissa . Per il 20avel anniversari da l'Opera Viva sco era la 10avla producziun d'opera han ils organisaturs decidì da preschentar ina opera gronda e renumada. Sut la direcziun dal manader musical, Gion Gieri Tuor vegni a dar totalmain nov rapreschentaziuns.

Mamma e figlia amez l'Aida

Ina da las finamiras da l'Opera Viva è da pussibiltar ad in e scadin d'esser ina giada part d'in'opera. Il chor è numnadamain in ensemble da persunas laicas – intgins en gia dapi ditg da la partida, auters savuran per l'emprima giada l'aria d'in palc d'opera.

Duas da questas novizas: Sandra Decurtins e sia figlia Paula che chantan uschiglio en il Chor cecilian Trun.

Impressiuns da l'Opera Viva 2025

Rudolf Mirer e l'Opera Viva

L'artist indigen Rudolf Mirer ha marcà l'entira istorgia da l'Opera Viva. Tut ils placats da las nov operas passadas sco era da l'actuala derivan dad el. Deplorablamain na sa il pictur-artist da Sursaissa, ch’è mort ils 12 da schaner 2025 en la vegliadetgna dad 87 onns, betg pli assister al project actual. Sia davosa creaziun: in fund mellen, sin il qual èn da vesair las figuras impurtantas da l'istorgia dad Aida.

L'art grafica da l'Opera Viva: 10 Placats en 20 onns

Producziuns dal passà