Petra Oggenfuss - «Jau hai per mintga cifra in maletg»

Curs e trenaments da la memoria porscha Petra Oggenfuss ad in e scadina. Il mument lavura ella dentant principalmain cun seniors e senioras en chasas d’attempads, tranter auter er per prevegnir a la malsogna demenza.

Sche nus faschain sport restain nus corporalmain fit. Il medem vala per il tscharvè. Trenain nus quel lura restain mentalmain fit.

Petra Oggenfuss lavura tranter auter er suenter ina metoda da Gregor Staub, ina corifea per il trenament da la memoria. Uschia ha ella per exempel per mintga dumber dad 1 fin 100 in maletg. Il tscharvè funcziuneschia meglier visualmain ed uschia saja pussibel da tegnair endament meglier cifras, dumbers, datas da naschientscha u er numers da telefon.

Legenda: «Cun il trenament da memoria cumbinà cun bler moviment vi jau prender ora il maximum da mes tscharvè.» RTR, Andreas Wieland

Creschida si è Petra Oggenfuss a Rabius che vegnia adina a restar sia vaira patria. La stad passada ha ella fatg durant in’emna in viadi a pe davent da ses dachasa a Winterthur enfin a Rabius, quai per avair ina giada temp be per ella senza stress, senza internet e medias socialas. Quest viadi ha ella dentant er cumbinà cun sia nova professiun. Uschia ha ella tegnì endament tut ils vitgs e lieus ch’ella ha visità durant quest viadi, er quai suenter la metoda da maletgs dad 1 fin 100.