Siglir tar il cuntegn

Pled rumantsch 2016 Barbagiat è il Pled rumantsch 2016

Ensemen cun il public ha Radiotelevisiun Svizra Rumantscha RTR tschertgà ils 13 da december 2016 il Pled rumantsch dal 2016. «Barbagiat» hajan gì quest onn blers, cunzunt suenter votaziuns ed elecziuns, uschia la giuria che ha tschernì il Pled rumantsch 2016.

Anna-Alice Dazzi e Gian Michael da la giuria dal Pled rumantsch 2016. Els guardan sin fegls e sesan vid ina maisa da biro.
Legenda: Anna-Alice Dazzi e Gian Michael da la giuria dal Pled rumantsch 2016. RTR, Gian-Marco Maissen

«Barbagiat» descriva il mal ch’ins ha suenter avair fatg memia bler sport, suenter ina notg cun bler alcohol, ma er il mal pervi da la dischillusiun suenter avair pers, per exempel ina votaziun u elecziun.

Legenda: Guardar il video «Pled rumantsch 2016 - co è vegnida tratga la decisiun?». Durada 1:01 minutas.
Or da Actualitad video dals 13.12.2016.

Da las 237 propostas ch'il public ha inoltrà ha la giuria tschernì il pled «barbagiat», perquai che blers han gì quest onn in barbagiat suenter la votaziun davart il Parc Adula e l’elecziun dal nov president dals Stadis Unids da l’America, argumentescha la giuria dal «Pled rumantsch 2016».

Quai sa mussa er vi da las propostas inoltradas: Il public ha inoltrà sur 30 propostas cun il tema «Trump» e passa 10 cun variaziuns dal tema «Adula».

Per la giuria era anc impurtant ch'il pled da l’onn 2016 è chapibel en tut ils tschintg idioms ruamantschs. Cun barbagiat è quai il cas.