«Il pled rumantsch 2017 'flutgets' è in vegl pled che nus avain emprestà dal tudestg ed integrà fitg bain en noss linguatg. El exista gia daditg ed è in pled fitg productiv. Ins chatta adina puspè novas significaziuns. Plinavant pon ins duvrar il pled en tut las regiuns rumantschas», di la linguista ed ina da las giuroras Anna-Alice Dazzi.
«Flutgets» suonda a «barbagiat» ch’è stà il pled da l’onn 2016.
Da la giuria han fatg part: Anna-Alice Dazzi, linguista RTR, Anita Capaul, manadra Chasa Editura Rumantscha e Gion Nutegn Stgier, schurnalist ANR. Tant la giuria sco era il public han gì ina cumpart da 50% tar l’elecziun dal Pled rumantsch. Igl ha dà passa 650 votings dal public.
En tut èn entradas passa 100 propostas per il pled da l’onn. Il pled «flutgets» è vegnì inoltrà da dunna Margrit Rufer-Cahenzli da Münsingen en il chantun Berna. Ella gudogna in bon da 500 CHF da la SWISS.
RR actualitad 17:00