(sursilvan) Questa fin d’jamna astgel jeu festivar in giubileum empau special: Jeu hai lu exact 40 onns e 40 dis! – Enzaco eis ei enzatgei special, mo jeu creiel strusch ch’enzatgi da vus vegness sill’idea da festivar quei giubileum tut aparti! Normalmein fan ins ina fiasta sch’ins ha cumpleniu in entir onn da veta, aber segir buc enzacu denteren.
La cefra 40 exprima biaras gadas ina experientscha humana.
40 onns e 40 dis – igl ei plitost stau ina casualitad che jeu hai encurschiu, che schon 40 dis ein vargai dapi miu anniversari rodund. Duas gadas 40, quei ei per mei, in teolog, schon enzatgei special, perquei che la cefra 40 ei ina cefra biblica.
Sch’ins dat in sguard ella bibla, lu tut che furmicla da quella cefra: 40 dis e notgs ha ei pluiu ella historia dalla arca da Noe, 40 onns ei Mose staus cun siu pievel el desiert e suenter eis el staus 40 dis sil cuolm Sinai, avon ch’el ha retschiert ils diesch condaments da Diu. Era 40 dis ei Jesus staus el desiert, ha fatg gigina, avon ch’el ha entschiet sia missiun ed ha purtau la buna nova als carstgauns. E suenter sia mort ei Jesus cumparius duront 40 dis a ses giuvnals avon ch’el ei lu turnaus tier siu bab en tschiel.
La cefra 40 exprima biaras gadas ina experientscha humana: 40 dis ei in temps ch’ei liungs avunda per rimnar experientschas profundas, iniziar midadas e far plans per il temps vegnent. Medemamein ein 40 onns in temps ch’ei liungs avunda per dar tempra ad ina era e da schar anavos fastitgs ella historia. – Era la Bibla vesa quels 40 dis (ni era ils 40 onns) sco temps per far ponderaziuns e reflexiuns: per sedumandar nua ch’ins stat, nua ch’ei drova forsa midadas; sedumandar tgei potenzials ch’ins ha e tgei ch’ins savess aunc realisar el proxim temps.
«40 onns e 40 dis» – Quei ei segir in giubileum empau special! Forsa buca ual in per celebrar e far grondas fiastas, mobein in giubileum per prender puspei empau temps e reflectar sia atgna veta.