Siglir tar il cuntegn

Header

audio
Pled sin via da Marcel Köhle
Or da Vita e cretta dals 30.04.2023. Maletg: MAD
laschar ir. Durada: 3 minutas 28 Secundas.
cuntegn

Pled sin via Agrischa, Assisi ed attenziun

(sursilvan) Enconuschis vus la vacca «Lola»? – Dapi in pèr jamnas vesel jeu ella bunamein di per di. Mintga ga che jeu mon atras Glion a spass, vesel jeu Lola. Inaga en quei cantun, l’autra en tschei cantun dil marcau. Mo era en auters vitgs hai jeu schon viu ella e schizun ellas gasettas quotidianas.

Probabel saveis Vus gia da tgei vacca che jeu tschontschel: igl ei la vacca sils placats dall’Agrischa 2023. Ella fa reclama per quei eveniment che ha liug questa fin d’jamna a Glion. – Cura che jeu hai viu quei placat per l’emprem gada, hai jeu sco habitont da Glion tertgau: «Super caussa, cheu vas a mirar! Cheu dat ei segir interessantas caussas da veser!» – Mo cura che jeu hai viu il datum, hai jeu saviu ch’ei dat nuot cun l’Agrischa… jeu sun en vacanzas!

Ed ussa, duront che jeu scrivel quellas lingias per il «Pled sin via», sun jeu miez ellas vacanzas, sesel davos il computer e quei cun ina bellezia survesta sur il marcau d’Assisi! Vacanzas ein era muments da guder! Jeu gaudel la cuschina taliana, jeu gaudel la natira che flurescha en tuttas colurs, sco era il cantinem dils utschals che desta mei mintga damaun.

Fagei inaga il propiest dad ir inaga cun attenziun tras il mintgadi! Jeu sun segirs che Vus vegnis lu a veser ed udir bellezia caussas da nossa natira.
Autur: Marcel Köhle Scolast primar

Ina gronda attenziun per la natira e per tut quei che viva e flurescha entuorn nus, veva era sogn Francestg d’Assisi. Sogn Francestg ei per biars enconuschent sco amitg dils animals e dalla natira. E quei ha bia da far cun sia spiritualitad: nus tuts, carstgauns ed animals, plontas e flurs, vent ed aua, essan scaffiziun. Ni sco sogn Francestg schess: nus essan frars e soras, nus essan affons dil Bab celestial che ha scaffiu tut. Perquei duein nus carezar il scaffiu, segidar in l’auter ed esser attents culla scaffiziun.

Surtut ozildi, nua che tuts tschontschan da crisa da clima e che nus stuein proteger ed esser attents da nossa natira, ei la spiritualitad da sogn Francestg puspei vegnida pli datier a mi. Ual en quels dis che jeu sun cheu ad Assisi, dattan ses plaids e co el ha viviu, novs impuls per mia veta da mintgadi ed surtut ina egliada pli aviarta per la scaffiziun.

Ins sto buca exnum vegnir ad Assisi per survegnir ina egliada pli aviarta. Vus saveis gie far quei, leu nua che vus steis: fagei inaga il propiest dad ir inaga cun attenziun tras il mintgadi! Jeu sun segirs che Vus vegnis lu a veser ed udir bellezia caussas da nossa natira. E tgi sa, forsa veis Vus gie schizun il cletg da veser ina «Lola» e quei buca mo sin in placat.

RTR 08:45 Pled sin via

Artitgels legids il pli savens