Avant ün pêr eivnas n’haja tut il cumanzamaint dal bap nos sco basa da meis impissamaints, in rumantsch il seguond pled: nos, in tschertas linguas o versiuns il prüm pled da l’uraziun. Ed hoz less eu tour l’ultim pled sco basa, il pled amen. Quai nu voul dir cha’ls pleds tanteraint nun hajan lur valur, tuot al cuntrari. Quist rom es daspö bod 2000 ons l’istess e quai ans lia culs umans da tuot quists tschientiners ed ans lia eir cun tuot ils umans d’hozindi chi dischan quist’uraziun. Id es üna rait enorma chi gnanca nu’s sa d’imaginar e quai cun quists pacs pleds aint il rom.
Amen, quai ha üna significaziun dubla: Id es uschè ed i vala.
Schi’s vezza co cha ledschas o oters texts han tuots la tendenza da gnir plü voluminus, da lair fixar adüna daplü ed adüna daplü in detagls, lura as poja be star stut, cha quist text es restà simpel, modest, disch in pacs pleds ed in ün stil s-chet enorm bler. No til interpretain, ma il text resta il listess.
Il text finischa cun amen, ün pled ebraic, surtut aint il grec, il latin ed in bod tuot las linguas dal muond. Amen, quai ha üna significaziun dubla: Id es uschè ed i vala. La prüma significaziun constata ün fat, la seguonda cha quist fat ha ün’importanza per mai. I vala. Dad üna pruna chosas savaina: Quai es uschè, ma quai ans es in fuond listess. Cha l’aua consista our da duos atoms idrogen ed ün oxygen, quai savaina, ma da l’aua ans interessan tuot otras chosas; sch’ella sbuorfla, sch’ella es netta, quai vala. Scha no rovain pel pan da minchadi e dschain l’ultim Amen, lura vala quai cun tuot las consequenzas, partir il pan cun oters, brich sguazzar, tgnair ot. Ed uschè cun tuot ils arövs. No rovain per quels chi ans han fat dal tort e per no cha no fain dal tort ad oters ed eir là dschaina a la fin: Amen, i vala.