(sursilvan) Tgi po ozildi aunc spitgar? Gie, tgi da nus ha aunc la pazienzia da spitgar. Savens hai jeu il sentiment che nus savein gleiti eliminar quei plaid ord il vocabulari.
Ed era jeu s’audel tier quels carstgauns che hai zuar en mia lavur culs affons dabia pazienzia. Mo spitgar e far sco quei ch’ils Tudestgs dian «Däumchendrehen», gliez ei propi buc il miu.
Dapi che jeu hai mezza buc auto hai era entschiet a far patratgs sur da quei tema. Ussa sun jeu cun mieds publics sin via. E dapi il niev urari hai jeu sin via alla lavur dapli temps pil spitgar. Ed aschia ha quei spitgar tuttenina survegniu ina autra muntada. Di per di stun jeu sper via e spetgel: la damaun, da miezdi, la sera magari persula e magari culs affons. Jeu stoi mo planisar auter e lu arrivel era el liug. Tut semplamein empau pli plaun.
Gl’emprem temps erel jeu, enten spitgar, adina occupada. Dabot aunc dar rispostas als mails. Ins ei gie dapertut ed adina contonschibels. Mirar las novitads da WhatsApp ni s’informar tut tgei che marscha viado el mund. Impurtont da duvrar miu temps da spetga nizeivlamein. Gie buca far nuot, gliez fuss gie temps piars.
Numnadamein prender peda per mei. In temps da tancar nova energia.
E tuttenina – suenter entgin temps – sun jeu vegnida pertscharta che jeu savess nezegiar quei temps tut auter. Numnadamein prender peda per mei. In temps da tancar nova energia. Jeu gaudel quels muments sin plaz posta cun contemplar ed observar. Saveis s’imaginar, cheu dess ei bia da raquintar, da quels muments amiez il vitg. Ei dat temps per sentupadas spontanas. Temps per ina paterlada. Temps per reflectar e planisar ni semplamein seser cheu e schar dar l’aura pils larischs.
E saveis tgei – la lavur scappa buc. Anzi, ei va suenter quella pausa pli tgunsch da far vinavon. E zatgei sai jeu aunc tradir: La damaun sun jeu lu buca quella che po spitgar – lu ves’ins savens mei a currend la davosa minuta enviers il plaz posta.
