(vallader) Chi es quai?
El dorma aint il crap.
El s’insömgia aint illa fluor.
El as sdruaglia aint illa bes-cha.
El sa ch’el es sdruoglià aint il uman.
Chi es manià cun quist «el»?
Manià es il spiert. Gratulaziun a tuot quels chi han chattà la soluziun. Manià nun es quel spiert chi sumaglia ad ün linzöl alb e chi prouva da far temma in ün chastè vegl. A l’incuntrari: il spiert ch’eu manai fa curaschi e dà forza quia ed uossa.
Nus festagiain in quists dis Tschinquaisma. La tradiziun quinta cha Gesu s’ha muossà davo sia mort e resüstanza adüna darcheu a sias scolaras ed a seis amis. Ma davo l’Ascensiun nu d’eira el plü pro els. Els han tschüf gronda temma ed as han zoppats. E lura, 50 dis davo Pasqua, il grond müdamaint. Els sun gnüts our da lur fouras ed han quintà plain plaschair e cun gronda persvasiun da la buna nouva, dad üna vita in pasch, cuntantezza e cumünanza.
Scha nus eschan attents pudain nus far l’experienza dal spiert mincha mumaint da nossa vita.
Quist nun es be üna bella istorgina d’ün temp fingià lönch passà. Minchün da nus ha fingià pudü far e po far mincha mumaint darcheu da nouv quist’experienza indescrivibla. Natüralmaing, nus eschan ün psicophisicum, nus vain ün corp ed üna psica cun emoziuns ed impissamaints – ma nus eschan amo bler daplü. Nus eschan nempe essenzialmaing spiert. Il spiert es quai chi fa our dad alch mort ün esser vivaint. Il spiert sa transfuormar temma in curaschi, deblezza in forza e s-chürdüm in clerità. Scha nus eschan attents, pudain nus far l’experienza dal spiert mincha mumaint da nossa vita. El es l’energia chi ans pussibiltescha da viver, mincha mumaint nouv. El es la forza chi fa cha noss cours battan e cha noss pulmuns tiran il flà. Il spiert fa cha nus eschan insomma. Nus eschan spiert. Esser uman voul dir: esser spiert chi’s es consciaint da sai svess.
Eu as giavüsch üna allegraivla e paschaivla festa da Tschinquaisma illa forza dal spiert vivaint!
