(vallader)
Perche daja vairamaing guerra? – Ün discuors tanter Gesu e Buddha (drama in ün act)
Prüm ed ultim act, prüma ed ultima scena
Ün bankin dasper l’autostrada, inglur tanter l’Ucraina e Gaza. Canera terribla dad autos in chadaina, tancs, aviuns, sirenas, bombas ed umans chi sbragian. Ün tschêl grisch. Ün flümin suos-ch e be merda cun üna dubiusa culur cotschna. Duos persunas sül bankin discuorran insembel.
Gesu: Eu sun uschè trist. Darcheu as coppan ils umans. Perche daja vairamaing guerra?
Buddha: La guerra cumainza bler plü bod co cha las prümas bombas vegnan büttadas. La guerra cumainza cun ün simpel impissamaint: Quist tocca a mai! Eu stögl avair quai! Uschea daja separaziun – e là ingio chi’d es separaziun, cumainza la guerra.
Gesu: Hai, exact. Separaziun. Ed our da la separaziun nascha la sentenza: Tü nun est sco eu. Lura vain la temma: Tü nu manajast bain cun mai. Ed our da la temma nascha lura la rabgia e l’ödi. Ed our da l’ödi la violenza.
Buddha: L’uman cumbatta perquai ch’el patischa. El nu bada però cha l’origen da la guerra es in sai. El craja cha seis inimi as rechatta dadourvart. Ma el nun inclegia cha el svess es il problem: sia ingurdia, sia ignoranza e sia rabgia.
Gesu: Eu tils n’ha dit: Amai a voss inimis! Na perquai ch’els sun meglders, ma perquai cha eir els patischan.
Buddha: Ed eu tils n’ha dit: Scha tü est bun dad incleger teis patimaint lura finischa la rabgia e l’ödi. Ma na tras la victoria cun forza, dimpersè tras l’incletta.
Gesu: Blers crajan chi cumbattan per il bun. Ma our dal nosch nu resulta mai alch bun. La violenza nun es mai üna soluziun. La soluziun cumainza cun l’incletta cha nus eschan tuots sours e frars, cha nus eschan tuots part da la listessa famiglia. Cha nus derivain tuots da la listessa funtana.
Buddha: Exact. E la pasch cumainza in nus svess. Ün’explosiun immensa. Ingün bankin plü. Vi dal tschêl grisch ün bulai alb. Silenzi.
Arno Arquint è creschì si a Scuol. El è teolog, psicolog e scienzià da religiun.