Siglir tar il cuntegn

Header

audio
Pled sin via
Or da Vita e cretta dals 10.10.2021.
laschar ir. Durada: 03:05 minutas.
cuntegn

Pled sin via Arövs da Teresa da Avila

Qualche cussagl per la vegldüna da Teresa da Avila .

Teresa da Avila ho vivieu i’l 15evel tschientiner ed eira üna duonna misticra e dunque plain sabgentscha. Ella vegn venereda in nossas religiuns ils 15 d’october. Ella ans ho eir transmiss qualche bun cussagl per la vegldüna in fuorma d’ün’urazchun.

O Segner, ura Teresa da Avila, tü sest meglder cu eau cha vegn da di in di pü veglia e cha saregia ün bel di propi vegliuorda.

Alura seguan ils arövs. Eau d’he tschernieu ün pêr dals quels.

Teresa da Avila rouva: Preserva’m da la cretta da stuvair dir qualchosa tar mincha occasiun e tar mincha tema.

Tar qualche persuna a me cuntschainta am do in ögl cha pü veglia ch’ella vain, dapü ho’la la schmagna da’s fer udir cun üna litania chi nu glivra pü. Ma fo que propi dabsögn? A la fin sun las reras dumandas da quels pü giuvens taunt pü preziusas e alura as po der gugent ils buns cussagls. Ma scha ün discuora be per la temma ch’el gess in schmanchaunza nu demuossa que üna granda sabgentscha.

Muossa’m la sabgentscha müravgliusa cha’m poss sbaglier.
Autur: Anna Ratti Viva en Bregaglia

Nun ho il muond dad hoz cun tuot la canera informativa dabsögn dapü da la glieud chi taidla?

Taidler als oters: cotiers ho Teresa da Avila eir ün aröv al Segner: Eau nu’m ris-ch da dumander il dun da taidler cun plaschair las descripziuns da las malatias dals oters, ma muossa’m da las supporter cun pazienzcha.

Ün oter aröv daTeresa da Avila es: Muossa’m la sabgentscha müravgliusa cha’m poss sbaglier.

Hozindi vegnan pretaisas robas pussiblas ed impussiblas e guai scha qualchün l’as metta in dumanda. Virologs e skeptikras, gurus e politikers nu haun taunt gugent, scha qualchün cuntradischa a que cha pretendan. Ma infin pudess que esser propi üna consolaziun da savair cha tuots, propi tuots e tuottas as paun sbaglier, cha que nu do vardets absolutas. Que nu voul dir cha nu s’ho ün egna opiniun, anzi, ma saviand cha’s po sbaglier as es pü aviert per üna discussiun interessanta e früttaivla.

Ed il l’ultim aröv da Teresa da Avila ch’eau d’he tschernieu es: Mantegna’m amabla – taunt scu pussibel.

Cun gnir pü vegl nu s’ho magari pü üngüna pazienzcha e’s dvainta dischagreabel. Que es eir il privilegi da la vegldüna dad esser pü radical. Ma as po eir dir la sia in möd amabel. Üna persuna chi cultiva ed as exprima cun la gentilezza dal cour es üna perla.

RTR 08:45 Pled sin via

Artitgels legids il pli savens

Scrollar a sanestra Scrollar a dretga