Daspö blers ans m’accumpagna il bap nos, el tocca pro meis ritual da m’indurmanzar, saja ch’el resta ün spür ritual, saja ch’eu rest pichà pro ün o l’oter aröv, saja ch’eu pens a l’üna o l’otra persuna our da la famiglia o dals cuntschaints. Ed adüna darcheu suna stut da la richezza chi’d es aint in quists pacs pleds.
Ultimamaing sun restà pichà pro’l seguond pled: Nos. I nun es meis bap, id es nos bap. I sun maniats adüna eir tschels, quels sper mai, eir quels cunter mai, chi pon dir nos bap.
I nun es meis bap, id es nos bap. I sun maniats adüna eir tschels, quels sper mai, eir quels cunter mai, chi pon dir nos bap.
Cur ch’eu chantaiva avant ans cul cor viril da Seewis, chantaivna jent la chanzun da la Chalavaina ed il refrain tunaiva: «Wir stehen all in Gottes Hand», ma quai gniva specifichà subit: «Wir Bündner und das Bündnerland». Gnanca da pensar cha Dieu vess gnü da far alch eir culs Austriacs – Dieu ans perchüra.
Ma i resta: Nos. E quai ans piglia davent la cretta e la fosa sgürezza cha no sulets sajan predilets, cha no hajan Dieu per no e be per no. Ma dit da la vart positiva: I dà eir la sgürezza e la fiduzcha ch’eu nu sun sulet, cha oters sun sper mai, cha aint in quist pled es cumprais la cumünanza.
Nos es bain ün pronom possessiv. Eir dovrà uschè? As poja discuorrer da nos bap sco da meis handy, mia chasa, nos auto? Noss uffants – sun quels ün possess da no? Mia duonna? Noss amis? Il pronom possessiv po exprimer ün possess, ma eir üna relaziun speciala, emoziunala, üna relaziun da respunsabiltà e da fiduzcha. E da brattar las duos expressiuns es fatal. Tuot in d’üna jada dvaintan ils uffants nos possess e lura nu possa plü tils laschar ir lur via in tuotta libertà – o dvainta meis auto meis pitschen Dieu, e guai schi capita alch ad el!
Bap nos – quai m’invida da ponderar: Ingio es meis cour, che e chi m’es important, che e chi am fess mal da til perder. Esa possess o relaziun speciala? Nos, ün pledin, be trais custabs ed ün muond aint in quels.