Siglir tar il cuntegn

Header

cuntegn

Pled sin via Baselgias ed edifecis illuminai en colur cotschna

En nies lungatg duvrein nus pliras expressiuns e maletgs per descriver la glisch. Cun nossa naschientscha vesein nus per l’emprema gada la glisch dil mund. Sch’enzatgi vul cuglienar nus, emprova el da menar nus davos la cazzola. Zuppein nus noss talents, vegnin nus admoni da buca metter nossa glisch sut ina curtauna. Sch’enzatgei gartegia buc aschi bein a nus, survegnin nus forsa il resun «ti eis buca grad ina gronda glisch». Senza dubi gartegia ei a nus da metter nossas capacitads ella dretga glisch. Duront grevs muments en nossa veta pudein nus magari buca spitgar da veser la glisch alla fin dil tunnel. Contemplein nus ils cuolms, la pezza, la natira, sche semuossa quella en differentas glischs.

Denton secapescha ei buca da sesez che mintgin porta la glisch ora el mund.
Autur: Lucia Wicki-Rensch Agid a la baselgia en miseria

Cheu seporscha la damonda, co nus contemplein quella glisch. En la bibla anflein nus la descripziun dalla glisch sco maletg ni metafra. Jesus sez di: «Jeu sun la glisch dil mund!» Denton secapescha ei buca da sesez che mintgin porta la glisch ora el mund.

Pia, la glisch ha ina gronda muntada per nies svilup corporal e spirtal. Ella resplenda energia, clarezia, vitalitad e buca il davos forza. Ei quei buc in emperneivel sentiment, sche nus savein entras la glisch sesentir emoziunalmein meglier? La glisch savein nus buc udir, mobein veser co ella sclarescha nies contuorn. Il pli fetg prendin nus si ses radis entras nos egls. Vesa buca mintga egl las medemas caussas? Ils cuolms imposants, il tschiel blau, l’aua clara, la rihezia da nossa natira ni il carstgaun che pitescha en nies contuorn?

Catedrala da Lugano
Legenda: Catedrala da Lugano Catedrala illuminada cotschen sco mussament da solidaritad cun ils cristians che vegnan persequitads. MAD

Ina sera egl advent, ina candeila, in fiug en pegna ni las glischs artificialas che illumineschan enqual casa e finiastra e dattan a nus in bien sentiment.

Gest quest’jamna ei entras l’iniziativa dalla fundaziun pontificala «Baselgia en miseria» vegniu illuminau sin nivel internaziunal baselgias, monuments, edifecis e casas da parlaments en colur cotschna, sco per exempel la statua da Niessegner en Brasilia, la casa dil parlament a Londra, la baseglia Sacre coeur a Paris, il colosseum a Roma. En Svizra han la catedrala da Sion e da Lugano e dil Signeradi a Vaduz ed aunc autras baselgias reformadas e catolicas fatg part da quella acziun sco mussament da solidaritad culs cristians che vegnan persequitai e smanatschai muort lur religiun.

RTR Pled sin via 08:45

Artitgels legids il pli savens

Scrollar a sanestra Scrollar a dretga