Igl ei zaco paradox. Tumasch, in dils giuvnals da Jesus, ei vegnius criticaus e vala sco nuncartent, perquei ch’el ha giu dubis. Pér cu Tumasch ha viu Jesus e sentiu las nodas vida ses mauns, ha el cartiu che Jesus seigi levaus da mort en veta. E nus, nus astgein ozildi gnanc pli crer quei che nus vesein cun agens egls!
«Künstliche Intelligenz» senumna quei fenomen che ha adina dapli influenza sin nossa veta. KI – per romontsch savein nus dir: IA – Intelligenza artificiala.
Mo atgnamein ei quei avis che nus astgein buca crer tut quei che vegn scret e detg, nuota zagei niev. Gia avon che la IA ha penetrau internet, interpresas e scienzias, savevan nus buc adina ir da quei anora che quei che nus udin ni legin seigi la verdad.
Jeu vai respect enviers quella intelligenza intransparenta, gie bunamein empau tema, co quella influenzescha nies mund, nossa lavur e nies patertgar. E tuttina ei in aspect era ord vesta dalla cardientscha fetg interessants. En connex cun la IA vegn adina puspei admoniu da buca crer tut quei che vegn raquintau e presentau egl internet. Ei savess esser «fake», pia falsificau. Era maletgs savessen esser in product dalla IA che han da far pauc cun verdad.
Mo atgnamein ei quei avis che nus astgein buca crer tut quei che vegn scret e detg nuota zagei niev. Gia avon che la IA ha penetrau internet, interpresas e scienzias, savevan nus buc adina ir da quei anora che quei che nus udin ni legin seigi la verdad. Cun la IA ei quei uss denton vegniu pli evident. Dat ei insumma ina verdad tut objectiva? Quei ch’ei per mei ver, quei ei influenzau da miu contuorn, da mias experienzas e mia savida. E sto buc esser la verdad per in’autra persuna.
Ussa che nus vesein, co la intelligenza artificiala sa strubegiar facts ed influenzar nies patertgar, eis ei clar che nus stuein consumar maletgs e datas cun egl critic. Buca crer en moda naiva, mobein cun empau distanza e saun giudezi. Ei duess esser logic.
Quei tuna uss puspei empau paradox. Mo era sch’ei pertucca la cardientscha, stuein nus saver, a tgi ni a tgei che nus savein sefidar. Jeu vi saver, sin tgei fontaunas che plaids ed artechels sebasan. Jeu sai sefidar da quels che fan rescherschas fundadas senza vuler manipular nus e senza vuler mo cuntentar nos interess. La verdad fa mintgaton mal. Mintgaton muossa ella nossas fleivlezias. Mo enqualga sesarvan aschia era novas portas e nus vegnin vinavon. Zatgei che Tumasch, il giuvnal da Jesus, ha segir era sentiu. Creis?