Nus stein all’entschatta dil temps da Cureisma ed ell’Ucraina vein nus dapi in onn uiara. Jeu less perquei prender la caschun da tschentar enqual damonda e proponer in pèr patratgs e reflexiuns.
Punct da partenza ei il fatg che la regenza russa ei dil meini da stuer liberar l’Ucraina dils nazis. Ei quei buc la blutta ironia, cu gest in Gediu ei actualmein president dall’Ucraina? Ella secunda uiara mundiala vegnevan ils Gedius persequitai dils nazis, ed uss vessen els quasi dad esser lur promoturs.
Mo mia damonda ei oz: Tgei maletg vein nus dils Gedius? – Denter ils cristians dat ei dus maletgs che descrivan la relaziun tier ils Gedius. Per l’ina valan els sco «frar vegl» dils cristians e per l’autra fuorman els «la ragisch» dil cristianissem. Dus bials maletgs, denton era cun ina vart cuntraria.
Punct da partenza ei il fatg che la regenza russa ei dil meini da stuer liberar l’Ucraina dils nazis. Ei quei buc la blutta ironia, cu gest in Gediu ei actualmein president dall’Ucraina?
In’egliada el Veder Testament muossa spert che buc dispet il frar vegl, mobein il frar giuven ei igl affon eligiu e carezau. Aschia eis ei tier Esau e Jacob (cf. 1 Mos 27), tier Josef e ses fargliuns (cf. 1 Mos 37). Ei para pia gnanc dad esser ton in cumpliment da numnar ils Gedius nies frar vegl.
Pauc auter eis ei cul maletg dalla ragisch. Secapescha dat la ragisch tegn e sustegn alla plonta ed ella nutrescha quella, mo la ragisch ei pil pli sut tiara e porta buc fretg.
Ei quei nossa tenuta enviers ils Gedius? – Sco tier l’uiara fuss ei la blutta ironia dad ussa aunc cumbinar ils dus maletgs numnai, pia ils Gedius sco frar vegl ch’ei sut tiara. Na, en emprema lingia ein els carstgauns sco Ti ed jeu, affons da Diu! Forsa pon els meinsvart era esser rabbi – pia nies scolast. Ed il rabbi sa che Jacob ed Esau han fatg pasch (cf. 1 Mos 33,1–17).