Siglir tar il cuntegn

Header

audio
Pled sin via da Johannes Flury
Or da Vita e cretta dals 19.03.2023. Maletg: RTR
laschar ir. Durada: 2 minutas 59 Secundas.
cuntegn

Pled sin via «Char Johann Sebastian»

Eu chant jent ed eu chant suvent, saja quai in coros, ma eir per mai privat. E cler ils temps avant Nadal, il temp da Paschiun ed eir da Pasqua am fan gnir adimmaint las melodias dals corals chi toccan pro. Ed i’m fan gnir adimmaint eir ouvras grandas sco las paschiuns o l’oratori da Nadal da Johann Sebastian Bach.  

Ün dals prüms numers da quist oratori es il coral d’advent famus: «Co dess eu tai retschaiver». Sco bod ingün oter coral tocca quel pro las eivnas avant Nadal. Cun quel coral cumainzan per mai Advent ed il temp da Nadal. Ma Bach fa chantar ün’otra melodia cun ils medems pleds. Id es ün oter coral chi as zoppa quia, ün coral chi nu tocca pro Advent, ma pro Venderdi sonch: O cheu plain sang e plajas. Perche fa Bach quai?

Meis char Johann Sebastian, tü ans hast dat musica ourdvart bella, ma eir bler da ponderar.
Autur: Johannes Flury Anteriur reverenda

Pro el nun es quai per cas, el voul dir alch cun plazzar üna melodia da Paschiun aintimmez l’ evenimaint da la naschentscha da Gesu. Ma che voul el ans dir?

Forsa voul el dir : Quist uffant, dal qual vain festagià quia la vgnüda, es destinà per üna via vers il patir e vers la crusch, el ha da portar la crusch da prüm davent.

O voul el dir quai: I sun ils istess umans chi s’allegran uossa da la vgnüda da l’uffant ed ün di sbrajaran els: Til mettai a la crusch. L’entusiassem da la dumengia da las palmas as müda d’ün mumaint a l’oter.

O voul el dir quai: I nu dà vita sainza patir, nascher e murir sun intretschats l’ün aint i’l oter. I resta ün misteri co cha s’allegrar e patir sun scumpartits, dalets e misergias ed ün uman porta leivmaing, l’oter porta greiv quai ch’el ha da portar.

O dafatta quai: Scha no lain sieuer a Gesu, nun es quai la via la plü simpla, be gloria e bainesser, algrezcha e plaschair, ma eir üna da dumandas e dubis, da portar ed avair greiv.

O forsa eir quai: In tuot quai cha Tü fast tras, bel e bun e nosch e greiv, nun est tü sulet.

Meis char Johann Sebastian, tü ans hast dat musica ourdvart bella, ma eir bler da ponderar. Grazcha!

RTR Vita e cretta 08:00

Artitgels legids il pli savens