Il pled da l’on 2021: «respet» – almain per rumantsch. – E forsa s’exprima cun quista tscherna eir l’opiniun cha ün pa daplü respet nu fess tantüna na don a nossa società, a nossa cultura politica ed a quella dals mezs socials. La cumischiun da la Svizra tudais-cha ha invezza elet il pled «Impfdurchbruch» – ed ha uschè decis per ün’expressiun cha be ün pêr specialists varan cugnuschü avant las debattas da l’on passà. In Romandia s’haja tschernü «iel» – ün pronom artificial chi cumbina il masculin «il» e’l feminin «elle» e chi dess da quai nan pussibiltar üna lingua neutrala, averta per duonnas ed homens. In Svizra taliana ha il pled «certificato» guadagnà il premi e muossa amo üna jada via vers la crisa da sandà.
Schi che sarà il pled dal 2022? In mincha cas speresch eu chi sarà ün pled chi refletta l’optimissem da la devisa biblica pel on chi ha güst cumanzà.
Uossa esa üna chosa da verer inavo vers il passà, e tuot ün’otra da verer vers l’avegnir. Schi che sarà il pled dal 2022? In mincha cas speresch eu chi sarà ün pled chi refletta l’optimissem da la devisa biblica pel on chi ha güst cumanzà. Minch’on tscherna üna cumischiun ün vers biblic per l’on chi vain. E per quist on hana tschernü: Cristus disch: «Eu nu s-chatscharà a quel chi vain pro mai.» (Joan 6,37)
Oramai cha nos muond cumplichà cugnuoscha üna pruna cundiziuns chi reglan l’access ad üna o tschella chosa, schi cha cunfins stricts (chi pon sainz’oter esser güstifichats) limiteschan la libertà dals umans, am fa quist vers simplamaing bain. Schi, la cretta in Cristus es averta per tuots. I nu voul diploms, notas, certificats, i nu voul pronoms chi fan straverer ün muond sainza differenzas, neir brich passaports e per üna jada nu fan gnanca dabsögn raps. «Eu nu s-chatscharà a quel chi vain pro mai.» (Joan 6,32) E «…chi chi vain pro mai nun avarà plü fam, e chi chi craja in mai nun avarà mai plü said.» (Joan 6,37) Dimena: mia proposta pel pled da l’on, fingià uossa, al seguond di da 365: Avertezza. Quell’avertezza chi lascha scuvrir be buonder il muond chi’s zoppa in minch’uman chi s’inscuntra, quell’avertezza chi maina ad accumplimaint ed üna vita plaina perche l’es averta per la cretta ed uschè per la spranza cha Dieu ans surprenderà eir quist on cun seis bön.
Uschè giavüscha a minchün ün 2022 marcà da grond’avertezza!